Саха сирин премьер-миниистирэ Галина Данчикова Кремилгэ РФ президенэ Владимир Путины кытта көрсүһүүгэ кыттыыны ылла. Манна бырабыыталыстыба бэрэссэдээтэлэ Дмитрий Медведев, Госдумаҕа «Биир ньыгыл Россия» баартыйа фракциятын, уопсастыбаннай тэрилтэлэр, о.д.а. бэрэстэбиитэллэрэ сырыттылар.
Тэрээһиҥҥэ уопсастыба олоҕор суолталаах сокуоннары, Владимир Путин ыам ыйынааҕы ыйаахтарын олоххо киллэрии тэтимин, ону таһынан сокуоннары тупсарыыга уопсастыбаннас уонна регионнар этиилэрин ырыттылар.
Көрсүһүү саҕаланыыта Владимир Путин Госдумаҕа быыбар буолара 12 күн хаалбытын санатта. Быыбар түмүктэммитин кэнниттэн кандидаттарга буолбакка, туох-ханнык иннинэ дьон болҕомто киинигэр туруохтааҕын өссө төгүл этэ.
«Россия дьиэ кэргэнин олоҕор дьайар боппуруос барыта: тас бэлиитикэ, куттал суох буолуута, оборона, ДьКХ, доруобуйа харыстабыла, үөрэҕирии, социальнай эйгэ ураты суолталаахтар», — диир кини.
Путин этэринэн, Госдума дьокутааттара баартыйалартан, биир мандааттаах уокуруктартан кэлбиттэриттэн тутулуга суох көдьүүстээхтик үлэлиир дьону фракцияҕа холбуур, түмэр наадалаах.
«Дьон итэҕэлэ сыралаах, чопчу үлэнэн толуйуллуохтаах», — диир дойду баһылыга.
«Биир ньыгыл Россия» баартыйа фракцията уонна уопсастыбаннас бэрэстэбиитэллэрэ тыҥаан турар (ол иһигэр Саха сиригэр эмиэ) боппуруостары дьүүллэстилэр. Манна хаарбах дьиэлэртэн дьону көһөрүүны ырыттылар.
Путин оҕолору оскуола иннинээҕи тэрилтэлэринэн хааччыйыыга баар ситиһиилэри бэлиэтээтэ.
Урукку өттүгэр Егор Борисов Дмитрий Медведевы кытта көрсүһүүгэ 3-тэн 7-гэр диэри саастаах оҕолор маннык тэрилтэлэргэ баар уочараттара икки сыл иһигэр суох оҥоһуллубутун эппитэ.
«Быйыл судаарыстыба уонна чааһынай хардарыта үлэлээһин чэрчитинэн уонна федеральнай бюджет өйөбүлүнэн оскуола иннинээҕи саҥа 30 тэрилтэ баар буолуоҕа», — диэбитэ Ил Дархан.
