Ил Дархан уонна бырабыыталыстыба дьаһалтатын салайааччы Федор Борисов Ил Түмэн бигэргэппит Саха сирин Уопсастыбаннай палаататын саҥа чилиэннэрин кытта көрүстэ.
Бүгүҥҥү туругунан палаата састаабын улахан аҥара бигэргэннэ. 22 уопсастыбанньык Ил Дархан ыйааҕынан бигэргэннилэр, оччо ахсааннаах киһи — Ил Түмэнинэн. Бары араас эйгэ үлэһиттэрэ: промышленность, бизнес, доруобуйа харыстабыла, үөрэҕирии, наука, культура.
Палаата үһүс чааһа өрөспүүбүлүкэ уопсастыбаннай холбоһуктарын бэрэстэбиитэллэриттэн аттарыллар. Киирбит этиилэри анал үлэлиир бөлөх көрөр. Бу туһунан тустаах пресс-сулууспа иһитиннэрэр.
Федор Борисов бэлиэтииринэн, Саха сирин Уопсастыбаннай палаатата — баһылыыр күүстээх уопсастыбаннай сэбиэт буолар. «Биһиги эһигиттэн көхтөөх үлэни күүтэбит«, — диэтэ кини.
Өрөспүүбүлүкэ салалтата гражданскай уопсастыба сайдыытыгар улахан болҕомтону уурар. Судаарыстыбаннай былаас уоргаттара Уопсастыбаннай палаатаны кытта социальнай суолталаах боппуруостары быһаарыыга, судаарыстыбаннай бырагыраамалар туолууларыгар, коррупцияны утарар үлэҕэ бииргэ үлэлииллэр.
«Эһиги толоруулаах былаас уоргаттарын уонна уопсастыбаннай тэрилтэлэр икки ардыларыгар муоста кэриэтэ буолаҕыт. Бииргэ үлэлиэхтээхпит. Куруук ыйытыылардаах, этиилэрдээх, баҕа санаалардаах кэлээриҥ. Бииргэ үлэлииргэ бэлэммит«, — диэтэ Федор Борисов.
