От ыйын 12 күнүгэр «Эллэй Боотур» спортивнай комплекска «Азия оҕолоро» Оонньуу тхэквондоҕа күрэхтэһиитэ саҕаланна. Саха сирин сүүмэрдэммит хамаандатын 20 спортсмен көмүскүүр.
«Өрөспүүбүлүкэ чиэһин Мирнэйтэн, Ленскэйтэн, Мэҥэ Хаҥаластан уонна Дьокуускайтан уон уол, уон кыыс көмүскүөхтэрэ. Атын хамаандалар хайдах бэлэмнээхтэрин мин этэр кыаҕым суох. Биллэн турар, Оонньууга бастыҥ тхэквондистар кэлбиттэрэ чахчы. Биһиги хамаандабыт киирсиигэ бэлэм. Хас да сборы ыыппыппыт, икки бүтэһик ыйга оҕолор кимиилээх бэлэмнэниини ааспыттара», — диэн СИА-ҕа хамаанда тренерэ Прокопий Федоров кэпсээтэ.
Турнир икки күн ыытыллар. Бүгүн барыллаан күрэхтэһиилэр буолаллар, сарсын финал аҥара уонна түмүктүүр киирсиилэр ыытыллыахтара.
