Саха сирин бырабыыталыстыбатын бэрэссэдээтэлэ Кирилл Бычков өрөспүүбүлүкэҕэ уматыгынан хааччыйыыны бигэргэтии боппуруостарыгар биэдэмистибэлэр икки ардыларынааҕы оробуочай бөлөх мунньаҕын ыытта. Билигин АИ-92 уонна АИ-95 мааркалаах бензин, ону тэҥэ дизельнэй уматык Томмот уонна Аллараа Бэстээх нефтебазаларын диэки айаннаан иһэллэр. Итини таһынан, Уус-Кукка диэри уматыгы ыытыы тэрилиннэ — салгыы Ленскэй, Өлүөхүмэ, Өлөөн уонна Мииринэй улуустарга тиэрдиэхтэрэ.
Киирэр ресурсалар муҥутуур көдьүүстээхтик туһаныллалларын туһугар, Кирилл Бычков аналлаах биэдэмистибэлэргэ сорудахтары биэрдэ.
Өрөспүүбүлүкэ нэһилиэнньэ олоҕор-дьаһаҕар куттал суох буолуутун хааччыйыыга уонна гражданскай оборонаҕа министиэристибэтэ уматык хампаанньаларын кытта уматык саҥа кээмэйэ кэллэҕин аайы сапараапкалыыр ыстаансыйаларга тэҥнээх уонна тохтоло суох тарҕанарын хааччыйыахтара.
Тырааныспар уонна суол хаһаайыстыбатын министиэристибэтигэр уматыгы тиэйиини инники күөҥҥэ тутар сорук турда. Манна уматыктаах тимир суол богуоннарын түргэнник ыытыы уонна сырытыннарыы эрэ буолбакка, уматык тэрилтэлэрин тиэхиньикэлэригэр анаан өрүһү паромынан туорааһыны тохтоло суох үлэлэтии эмиэ киирэр.
Өрөспүүбүлүкэ уматыгы туһанааччыларыгар кэмигэр тиэрдиигэ, сезоннай тырааныспар хааччахтарын учуоттаан, дьаһаллар олоххо киирэллэр. Чуолаан, өрүһү туоратыыны уһатар туһуттан мууһунан сылдьар флоту үлэлэтэргэ, ону тэҥэ Аллараа Бэстээхтэн улуустарга уматыгы суһаллык тиэрдэр туһугар кыһыҥҥы суоллары эрдэ арыйар былааннанар. Саха сирин бырабыыталыстыбата уматык кэлиитин, өрөспүүбүлүкэ нефтебазаларыгар нормативнай саппаастар үөскээһиннэрин уонна салгыы улуустарга тиэрдиини кэтээн көрөр.
