Саха тустууктара Манчаары Ильинов уонна Константин Капрынов Ахмат Кадыров кэриэһигэр анаммыт норуоттар икки ардыларынааҕы турнир боруонса призёрдарынан буоллулар. Бу туһунан «Триумф» ЦСП иһитиннэрэр.
Дьоҕус финалга Саха сирин хамаандатын икки тустууга Иран бэрэстэбиитэллэрин кытта күөн көрсүөхтээхтэрэ. Утарылаһааччылар кэлбэтэхтэринэн, кыайыыны саха спортсменнарыгар биэрдилэр.
61 кг диэри ыйааһыннаахтарга Манчаары Ильинов боруонса мэтээлгэ Халид Магомедовы кытта 3:2 ахсаанынан уоскутар хапсыһыыны кыайда. Ильиновка бу мэтээл — норуоттар икки ардыларынааҕы таһымҥа бастакы улахан ситиһиитэ.
74 кг диэри ыйааһыҥҥа Саха сирин хамаандатын хапытаана Константин Капрынов уоскутар хапсыһыыларга икки кыайыыны ситистэ: Дагестантан Магомед Магомедовтыын 8:5 ахсаанынан уонна Казахстантан Нурдаулет Сейлбековы кытта 7:1 ахсаанынан.
Боруонса мэтээллэр иһин Манчаары Ильинов уонна Константин Капрынов 1-дии тыһыынча дуоллары тутуохтара.
