Саха сиригэр Уопсастыбаннай кэтээн көрүү киинэ (УКК) үлэтин саҕалаата, бу тэрилтэ Арассыыйа Федерациятын Судаарыстыбаннай Думатыгар быыбардар түмүктэниэхтэригэр диэри хонтуруолу сүрүннүөҕэ. Манна быыбардар сокуонунан хайдах баран иһэллэрин, төһө аһаҕастык ыытыллалларын кэтээн көрөллөр, диэн sakha.gov.ru иһитиннэрэр.
Кииҥҥэ улахан видеонан экран баар, манна 15 сөкүүндэ ахсын өрөспүүбүлүкэ хас биирдии быыбардыыр учаастагыттан хаартыска уларыйан иһэр. Быыбардыыр учаастактарга камералар бүтүн өрөспүүбүлүкэ үрдүнэн туруорулуннулар. Ону таһынан, манна көмпүүтэрдээх үлэ миэстэлэрэ оҥоһуллубуттар, онно эмиэ быыбар барыытын дьиҥ бириэмэҕэ кэтээн көрүөххэ сөп. Өскөтүн уустук эбэтэр өйдөммөт быһыы-майгы үөскээтэҕинэ, устуулары төннөн көрөн, чахчылары бэрэбиэркэлиир кыах баар.
«Саха сирэ үс чаас арааһыгар олорор — биһиги Арассыыйа Федерациятын ураты субъегабыт. Онон Уопсастыбаннай кэтээн көрүү киинэ, куорат утуйа сыттаҕына, оттон өрөспүүбүлүкэ сорох оройуоннара быыбардыы тахсар кэмнэригэр, сарсыарда 5:30 чаастан үс күнү быһа үлэлиэҕэ. Бүгүҥҥү күҥҥэ бары камералар тургутуу эрэсиимигэр үлэлииллэр. Балаҕан ыйын 18–20 күннэригэр бу саала бүтүн өрөспүүбүлүкэ үрдүнэн быыбар барылын дьэҥкэтин, аһаҕаһын уонна сокуоннайын хонтуруоллуур сүрүн ыстаапка кубулуйуоҕа. Манна инники күөҥҥэ сылдьар сыыппара технологиялара, видео-кэтээн көрүү уонна уопсастыбаннай көҕүлээһин биир уопсай сыал туһугар холбоһоллор — чиэһинэй быыбары хааччыйыы», — диэн өрөспүүбүлүкэ Уопсастыбаннай палаататын бэрэссэдээтэлэ Станислав Иванов бэлиэтээтэ.
Быыбары дьэҥкэтин хааччыйар туһугар өрөспүүбүлүкэҕэ 1900-тан тахса уопсастыбаннай кэтээн көрөөччү бэлэмнэннэ, кинилэр учаастактарга үлэлиэхтэрэ.
«Уопсастыбаннай кэтээн көрүү киинэ — бу үлэ былаһаакката, биһиги хайдах курдук чиэһинэйдик, аһаҕастык куоластыырбытын, сокуону кэһии суоҕун хонтуруоллуур аналлаах. Манна баартыйалар, хандьыдааттар бэрэстэбиитэллэрэ, уопсастыбаннай кэтээн көрөөччүлэр уонна эспиэрдэр үлэлиэхтэрэ. Технологиялар аһаҕастык үлэлииллэрэ — түмүк дьиҥнээҕин мэктиэтэ. Кыһаллар дьону кэлэн, кэтээн көрөөччү буолан, чиэһинэй, дьэҥкир быыбары хааччыйар мэктиэлэринэн буоларгытыгар ыҥырабын», — диэн өрөспүүбүлүкэ Киин быыбардыыр хамыыһыйатын бэрэссэдээтэлин солбуйааччы Иван Андросов бэлиэтээтэ.
Өрөспүүбүлүкэ Уопсастыбаннай палаата гражданнары гражданскай позицияларын биллэрэн, балаҕан ыйын 18, 19 уонна 20 күннэригэр быыбардыыр учаастактарга кэлэн, Арассыыйа Федерациятын Судаарыстыбаннай Думатыгар дьоһуннаах хандьыдаакка куоластыырга ыҥырар.
