Саха Өрөспүүбүлүкэтигэр коронавируһунан ыалдьыы балаһыанньата уустугунан уонна күһүҥҥү булт саҕаламмытынан, улуустарга бултуу барааччылар хайаан да COVID-19 ыарыы утары вакциналаныахтаахтара эбэтэр быһыы ылбыт буолуохтаахтара ирдэнэр. Ол туһунан экология министиэристибэтэ санатар.
Балаҕан ыйын 16 күнүнээҕи туругунан Саха сиригэр эбии 174 киһи сыстыганнаах ыарыыга хабылынна. Саамай элбэх түбэлтэ Дьокуускайга — 102.
Санатар эбит буоллахха, балаҕан ыйын 14 күнүгэр Ил Дархан ыйааҕынан региоҥҥа ойуур баһаардарынан биллэриллибит ыксаллаах-быһыы майгы устуллубута. Онон бултааһыҥҥа киллэриллибит хааччахтар тохтотуллубуттара.
Булт болдьоҕо булгуччулаахтык тутуһуллуохтаах: уу көтөрүгэр — соҕуруу көтүөхтэригэр диэри, ойуур көтөрүгэр — ахсынньы 31 күнүгэр диэри, сүрүн туйахтаах кыылларга — балаҕан ыйын 15 уонна алтынньы 1 күннэриттэн, оттон күндү түүлээх кыылларга — балаҕан ыйын 15 күнүттэн.
