«Сахамедиа» холдинг «Сүрүн ыйытык» бырайыагын чэрчитинэн СИА саайтыгар 50-тан тахса ыйытык киирдэ. Манна дьон-сэргэ өрөспүүбүлүкэ баһылыгыттан Егор Борисовтан саамай тутаах боппуруостарга хоруйу ылар кыахтаахтар. Бырагырааманы холдинг генеральнай дириэктэрэ Кирилл Алексеев иилээн-саҕалаан ыытар.
Дьокуускай куораттан, Амма, Чурапчы, Ленскэй, Эдьигээн, Өлүөхүмэ, Муома, Үөһээ Халыма, Мэҥэ Хаҥалас, Сунтаар, Үөһээ Дьааҥы оройуоннарын хаһыаттарын эрэдээктэрдэрэ киирбит ыйытыктарга олоҕуран тыҥаан турар 5 сүрүн тиэмэни таллылыр. Онно Уһук Илиҥҥэ гектар сири босхо биэрии, сир баайын туһаҕа таһаарааччылар өрөспүүбүлүкэни кытта сыһыаннара, Саха сирин бырабыыталыстыбатыгар уларыйыылар, үрдүк уонна орто үөрэх кыһаларын устудьуоннарын өйөөһүн, киин куорат 17-с кыбаарталын тутуу тиэмэлэрэ киирдилэр.
Итинтэн биирэ бырайыак бастакы таһаарыытыгар Ил Дарханы кытта кэпсэтиигэ көтөҕүллүөн сөп. Ханнык тиэмэ буоларын ааҕааччылар, көрөөччүлэр куоластаан быһаараллар. Бүгүн, алтынньы 11 күнүгэр СИА саайтыгар куоластааһын саҕаланна.
Бырагыраама видео биэрсийэтэ СИА порталыгар, матырыйааллар «Якутия» уонна «Саха сирэ» хаһыаттарга бэчээттэнэллэр.
