Үөһээ Бүлүү улууһугар ый ахсын араас хабааннаах социальнай төлөбүрү ылар дьон испииһэгэр 11 тыһыынчаттан тахса олохтоох хабыллар. Управление салайыытыгар 2003 сылтан оҕолоох дьиэ кэргэттэргэ социальнай көмө оҥорор отдел бэриллэн, оҕо пособиетын анааһыны, оҕолоох ыаллары учуоттааһыны ыытар.
Үөһээ Бүлүү улууһун Социальнай көмүскэл управлениетын салайааччытынан 2004 сылтан РФ гражданскай сулууспатын референэ, үлэ бэтэрээнэ, СР социальнай сулууспатын туйгуна Лидия Никифоровна Ильина таһаарыылаахтык үлэлиир. «Ил Дархан Егор Борисов муус устарга таһаарбыт Ыйааҕар олоҕуран кыра дохуоттаах кыаммат ыалга аадырыстаммыт көмө оҥоһуллуутун хаҥатар сыаллаах итиэннэ дьарыктаах буолуу таһымын үрдэтэн, үлэһит дьон ахсаанын элбэтэр туһугар үлэлэһэбит. Манна сүрүннэрин кылгастык бэлиэтээн этэр буоллахха, оҕо пособиета 1,5 төгүл үрдүөхтээх, кыра дохуоттаах кыаммат ыалга, быстар мөлтөх усулуобуйаҕа олорор аҥардас дьоҥҥо аадырыстаммыт көмө икки төгүл, үлэтэ суох дьону дьарыктаах оҥорууга көрүллэр үбү үс төгүл, тыа сиригэруопсастыбаннай үлэни көҕүлээһиҥҥэ 3,5 төгүл, кыайан үлэни булунар кыаҕа суох дьону быстах кэмҥэ үлэлэтэргэ анаммыт тэрээһиннэргэ 7 төгүл улаатыннарар туһунан ыйыллыбыта. 18-гар диэри саастаах оҕолор музейдарга, 5 уонна онтон элбэх оҕолоох ыаллар оҕолоро культура уонна спорт тэрилтэлэригэр босхо сылдьыыларын хааччыйыы көрүллүөхтээх. Итиэннэ оскуола таҥаһынан хааччыйыыга көрүллэр көмө харчы, саҥа төрөөбүт оҕоҕо таҥас наборун, кыаммат ыаллар 2-гэр диэри саастаах оҕолорун аһылыгынан хааччыйыы, үһүгэр диэри саастаах оҕолорго уонна элбэх оҕолоох ыаллар 6-гар диэри саастаах оҕолоругар босхо эминэн хааччыллыылара, кыра дохуоттаах ыал оскуолаҕа үөрэнэр оҕолоругар чэпчэтиилээх аһылыгы көрүү о.д.а. социальнай көмөлөрү салҕыы ыытарга сорук турар. Бу ыйыллар социальнай көмөлөр, биллэн турар, улуус тэрилтэлэрин көмөтө суох кыаллыбаттар. Онон кинилэргэ махтанабыт. Инникитин да бииргэ үлэлииргэ бэлэммит», — диэн салайааччы кэпсиир.
Үлэһит коллектив састааба уопуттаах. Ол курдук, РФ гражданскай сулууспа рефреннэрэ, СР социальнай сулууспатын туйгуннара Мария Кирилловна Чомчоева, Тамара Данилован Боескорова, Дария Елисеевна Будищева, Софья Николаевна Иванова, Тамара Гаврильевна Адамова, сулууспа соҕотох эр киһитэ Михаил Дмитриевич Сибиряков, уонтан тахса сыл бухгалтерынан үлэлиир Наталья Семеновна Струкина, Екатерина Васильевна Прокопьева буолаллар. Оттон саастарынан саамай эдэр эрээри үлэлэрин уопутунан бэтэрээннэртэн хаалсыбат үлэлээх үлэһиттэринэн Светлана Акимова, Яна Васильева буолаллар.
Кырдьаҕас, кыаммат, көрөр-харайар киһитэ суох хаалбыт аҥардас олорор дьоҥҥо күүс-көмө, өйөбүл-тирэх буолар социальнай үлэһит буолар. Улууска 18 нэһилиэгинэн 22 үлэһит 185 кырдьаҕаһы дьиэлэринэн сылдьан көрөр-истэр. Хомустаах, Быракаан уонна Балаҕаннаах нэһилиэктэригэр нэһилиэнньэтин ахсаана аҕыйаҕынан сибээстээн үлэһиттэр көрүллүбэттэр. Бу отдел сэбиэдиссэйинэн Софья Николаевна Иванова үлэлиир. Үлэтин туһунан маннык этэр: «Сааһырбыт дьон болҕомтону олус эрэйэр. Кырдьаҕас дьону кытары алтыһар буоларбыт быһыытынан кинилэр уйулҕаларын өйдөөн үлэлииргэ кыһаллабыт. Аймахтара, оҕолоро суох соҕотох кырдьаҕастардаахпыт, сорохтор оҕолоро ыраах улуустарга туспа ыал-күүс буолан олороллор. Инньэ гынан бэйэбит соҕотоҕун олоробут диир буоллахтарына киһи бырааба күөмчүлэниэ суохтаах. Ол быһыытынан соҕотох дьоҥҥо көмөлөһөр биһиги сүрүн эбээһинэспит. Кинилэри кытары ыкса үлэлэһэр буоламмыт, түүннэри-күнүстэри диэбит курдук, ордук ыарытыйдахтарына эрийэн билсэ, кэпсэтэ олоробут. Доруобуйаларын туруктарынан көрөн киин балыыһаны кытта үлэлэһэбит. Нэһилиэктэр баһылыктара олохтоохторугар мас, муус боппуруоһугар көмөлөһөн абырыыллар».
2008 сылтан бэттэх Маргарита Юрьевна Александрова директордаах Үөһээ Бүлүүтээҕи сокуоннай саастарын ситэ туола илик оҕолору реабилитациялыыр киин бэрт таһаарыылаахтык үлэлиир. Манна төрөппүт көрүүтэ-истиитэ суох хаалбыт, түптээн олорор дьиэтэ миэстэтэ суох, дьиэ кэргэнигэр табыллыбакка олох ыарахаттарын көрсүбүт оҕолор киирэн ааһаллар. Кинилэргэ анаммыт сөптөөх усулуобуйаны олохтуур, улахан көмө буолар үлэни ыытар 22 үлэһит көрүллэр.
