Эбээн Бытантай улууһугар түргэнник ситэр салааны сайыннарар сыалтан Хатастааҕы сибиинньэ комплексатыттан 30 сибиинньэ оҕотун уонна Дьокуускайдааҕы көтөр фабрикатыттан 100 сымыыттыыр кууруссаны тиэйэн аҕаллылар. Онон сайыҥҥы кэмҥэ эбээн бытантайдар бэйэ бородууксуйатын сиир кыахтаннылар.
Эбээн-Бытантай улууһугар дьиэ кыылларын сайаапка быһыытынан тарҕаттылар. Олохтоох нэһилиэнньэ кууруссаны 355 солк, оттон сибиинньэни тыыннаах ыйааһыныттан көрөн атыыластылар.
Дьиэ кыыллара айаннаан тиийбит ороскуоттарын СӨ тыатын хаһаайыстыбатын Министиэристибэтэ толуйар.
Санатан эттэххэ, бырабыыталыстыба бэрэссэдээтэлэ Андрей Тарасенко түргэнник ситэр салааны өйүүр туһунан көҕүлээһининэн, Тыа хаһаайыстыбатын министиэристибэтэ “Түргэнник ситэр салаа кыылларын, көтөрдөрүн уонна астарын-үөллэрин тиэрдиигэ көрсүллэр тырааныспар ороскуотун сабыыга өрөспүүбүлүкэ хааһынатыттан МТ бүддьүөттэригэр бүдьүөт икки ардынааҕы трансферы биэрии Бэрээдэгин туһунан” диэн бырабыыталыстыба уурааҕын бырайыагын оҥорбута. Бу уураах “2020-2024 сылларга тыа хаһаайыстыбатын сайыннарыы уонна тыа хаһаайыстыбатын бородууксуйатын, сырьетун уонна ас-үөл ырыынагын бэрээдэктээһин” өрөспүүбүлүкэ бырагырааматын чэрчитинэн тахсар. Бу сыалга бүддьүөт үбүттэн 55 мөл. солк. анаммыта.
Бу дьаһал олохтоох оҥорон таһаарыыны улаатыннарар, нэһилиэнньэ ороскуотун кыччатан, аахсар дохуота улаатарыгар көмөлөһөр сыаллаах. Кыыл-сүөл, көтөр, кинилэр астара улуус кииннэригэр тиэрдиллэр. Онтон салгыы оройуоннар бэйэлэрэ нэһилиэктэригэр тиксэриэхтээхтэр.
Бырайыак быһыытынан 13 хоту уонна Арктика улуустарыгар, ону тэҥэ Бүлүү бөлөх улуустарга түргэнник ситэр салаа кыылларын, көтөрүн, концентрированнай астарын тиэрдиигэ, о.э. тырааныспар ороскуотун 100 % уйунар. Киин уонна илин эҥэр 18 улууһугар – тырааныспар ороскуотун 50 бырыһыана сабыллар, суруйар https://www.instagram.com/agrarnaya_yakutia/
