Сэтинньи ый бүтүүтэ Дьокуускай куорат Ленин проспегынан Кулаковскай уулуссатыттан ЛОРП дьиэтигэр диэри айанныыр суол аһыллыаҕа. Ол эрээри, бу суолу учаастагар маршрутнай оптуобустар анал хамыыһыйа быһаарыытынан эрэ кэннэ сылдьан саҕалыахтара.
«Ленин проспегынан сырыыны сэтинньи 20 күнүн кэнниттэн аһарга былаанныыбыт. Билигин суолу-ииһи тэрийии техническэй тутууларын, светофордары, таһырдьа сырдатар линиялары туруоруу үлэлэрэ бара тураллар», — диэн МКУ «Главстрой» дириэктэрин солбуйааччы Афанасий Александров иһитиннэрдэ.
Онуоха Дьокуускай мэриятыгар бэлиэтээбиттэринэн, маршрутнай оптуобустар Ленин проспегынан тута айаннаабытынан барыахтара суоҕа.
