Эдэр каадырдары өйүүр киин Дьокуускайга «Саха сиригэр үлэлээ» II бэстибээли тэрийдэ. Тэрээһин чэрчитинэн, аан бастакытын баахта ньыматынан үлэлии барыан баҕалаахтарга карьернай кастинг ыытылынна. Саҥа үлэ көрдөөччүлэри кытта алта хампаанньа: ЯТЭК, ИНК, «Прогноз», GV GOLD, «Саханефтегазсбыт» уонна «Якутскгеология» кэпсэтиилэри ыыттылар. Кастиҥҥа 40 эдэр киһи кытынна.
Бэстибээл үлэ биэрээччилэри, үөрэх тэрилтэлэрин уонна эдэр дьону түмтэ. Тэрилтэлэр бэрэстэбиитэллэрэ бэйэлэрин хампаанньалара тугунан дьарыктаналларын көрдөрөр маастар-кылаастары уонна интерактивтары ыыттылар.
Оскуола оҕолоро, устудьуоннар уонна выпускниктар топ-үлэ биэрээччилэри кытта алтыһар, стажировка эбэтэр быраактыка туһунан кэпсэтэн, инникитин үлэҕэ киирэр кыахтаннылар. Сорохторго бу карьераларыгар бастакы хардыынан буолла.
Тэрийээччилэр Саха сиригэр саҥа үлэ миэстэлэрэ тахсалларын уонна киэҥ хабааннаах бырайыактар сайдалларын бэлиэтээтилэр. Бу хас биирдии киһи төрөөбүт дойдутугар бэйэтин кыаҕын арыйарыгар ананар. Эдэр дьон — өрөспүүбүлүкэ сүрүн баайа уонна кэскилэ, онон хас биирдиилэрэ дууһаларыгар сөп түбэһэр идэни булалларыгар туһуламмыт үлэ ыытыллар.
Бу тэрээһин Арассыыйа Бэрэсидьиэнэ Владимир Путин көҕүлээбит «Кадры» национальнай бырайыагын иитинэн «Дьарыктаах буолууга көдьүүстээх көмө» федеральнай бырайыак чэрчитинэн ыытылынна.
