Дьокуускай куоракка сөтүө кэмэ бэс ыйын 8 күнүгэр аһылынна. Куорат баһылыга Евгений Григорьев иһитиннэрбитинэн, пляж сынньанааччыларга анаан толору бэлэм: кумах уонна уу боруобаларын анаалыстарын түмүктэринэн, ону тэҥэ Роспотребнадзортан эбийиэк үлэҕэ киирэригэр көҥүл биэрии туһунан үчүгэй түмүктэр ылылыннылар.
Пляж бары сулууспалара толору хааччылыннылар: быыһааччылар уонна хомуйааччылар үлэлииллэр, туалет баар. Кэтэх харабыллыыр тэрилтэни кытта дуогабар түһэрсиллибит, харабыллааһын суукка устата барар, территория видео-кэтэбилинэн хонтуруолланар.
Пляж сарсыарда 6 чаастан киэһэ 23 чааска диэри үлэлиир. Сөтүө сарсыарда 9 чаастан киэһэ 21 чааска диэри көҥүллэнэр.
Үлэ күнэ да буоллар, пляж арыллыытын бастакы күнүгэр элбэх киһи мустан сынньанна: эдэрдэр, биэнсийэлээхтэр, оҕолорун кэлээскэҕэ илдьэ сылдьар ийэлэр.
