Өрөспүүбүлүкэ судаарыстыбаннай музейдара ахсынньы 22 күнүгэр «Триумф» спортивнай комплекска «Якутия: триумфальные вехи столетия» холбоһуктаах быыстапканы туруордулар. Манна Максим Аммосов уонна кини соратниктара Платон Ойуунускай, Исидор Барахов, Степан Васильев уонна Степан Аржаков үлэлэрэ, олохторо көрдөрүллэр, суруйар СИА.
Саха автономиятын төрүттээччилэргэ анаммыт быыстапка Максим Аммосов 125 сылыгар, Саха АССР 100 сылыгар, Саха сирэ Россия састаабыгар киирбитэ 390 сылыгар ананна. Тэрээһиҥҥэ култуура миниистирэ Юрий Куприянов кыттыыны ылла.
«Максим Аммосов, автономияны олохтоспутун таһынан, өрөспүүбүлүкэни үөрэтиигэ улахан кылаатын киллэрбитэ. 1925 — 1930 сылларга ССРС наукаларын Академиятынан биир кэлим экспедицияны ыыттарбыта. Ол түмүктэрэ Саха АССР сайдыытыгар төрүөт буолбуттара», — диэн Станислав Дьяконов, М.К. Аммосов аатынан судаарыстыбаннас историятын музейын научнай сотруднига эттэ.
Хаартыска: Андрей Сорокин, СИА
