Атырдьах ыйын 20 күнүттэн Дьокуускайдааҕы ГРЭС уонна ГРЭС-2 саппаас көрүҥнээх оттукка тэриллэри былааннаах тургутуулара саҕаланыа. Күһүҥҥү-кыһыҥҥы кэмҥэ бэлэмнэнии чэрчитинэн, исписэлиистэр газотурбиннай тэриллэри уонна итии ууну биэрэр хочуолунай дизельнэй оттукка көстөхтөрүнэ хайдах үлэлииллэрин бэрэбиэркэлиэхтэрэ.
Манан сибээстээн киин куорат олохтоохторо сырдык буруо хараҥа өҥҥө уларыйбытын кылгас кэмҥэ бэлиэтии көрүөхтэрин сөп.
«Якутскэнерго» хампаанньа быһаарбытынан, бу көстүү үлэ хаамыытынан уонна куттала суох, бары тахсыылар туруоруллубут нуормаларга эппиэттииллэр уонна кэтээн көрөр уорганнар хонтуруолларыгар бааллар.
Маннык тургутуулар сыл аайы кыһыҥҥа бэлэмнэнии иһинэн ыытыллаллар уонна оттук сезонун эрэллээхтик ааһарын мэктиэлиир булгуччулаах бырагыраама сорҕотунан буолаллар.
