Дьокуускайга бэнидиэнньик сарсыарда М. Н. Жирков аатынан музыкальнай колледж дьиэтин эвакуациялаатылар. СИА-ҕа иһитиннэрбиттэринэн, үөрэх тэрилтэтин дьаһалтатыгар Росгвардия уонна экстреннай сулууспалар үлэлииллэр.
«Эвакуация 09:35 чааска буолла. Электроннай почтаҕа куттуур ис хоһоонноох суруктары туппуппут. Тута суһал сулууспалары ыҥырдыбыт, Росгвардия үлэлии сылдьар. Эмсэҕэлээбиттэр суохтар», — диэн тэрилтэ дириэктэрэ Алексей Щербаков иһитиннэрдэ.
Кини бу курдук ис хоһоонноох суругу хас даҕаны электроннай аадырыска ыыппыттарын чуолкайдата. Баҕар атын үөрэх тэрилтэлэрэ эмиэ туппут буолуохтарын сөп.
