Дьокуускайга ыам ыйын 7 күнүгэр киэһэ Аҕа дойду улуу сэриитигэр Кыайыы 81 сылыгар анаммыт «Өйдөбүнньүк Чүмэчи» Бүтүн Россиятааҕы патриотическай аахсыйа буолла. Тэрээһин Кыайыы болуоссатыгар ыытылынна, куорат тыһыынчанан олохтооҕун, ыалдьыттары түмтэ.
Аахсыйаҕа эрэгийиэн салалтатын бэрэстэбиитэллэрэ, депутаттар, бэтэрээннэр, Россия Геройдара, ону тэҥэ ыччат уонна уопсастыба кытыннылар. Ил Дархан Айсен Николаев, былаас уорганнарын салайааччылара уонна уопсастыбаннай тэрилтэлэр бэрэстэбиитэллэрэ бааллар.
Үөрүүлээх бырагыраама сэрии сылларын ырыаларын уонна документальнай хроникалары трансляциялааһынтан саҕаланна. Дьон чүмэчилэрин тутан, сэрии сылларыгар өлбүттэри ытыктаан, киин стелаҕа холунанан аастылар.
«Бу чүмэчи уоттарыгар сэрииттэн төннүбэтэх дьон кутурҕаннара, фронтовиктарга, тыыл үлэһиттэригэр, санныларыгар ыарахан тургутууну ылынан, Улуу Кыайыыны чугаһаппыттарга махталбыт баар. Саха сиригэр бу өйдөбүл ордук күндү. Биир дойдулаахтарбыт дойду үрдүнэн сарын-сарыннарыттан тутуһан, Кыайыы туһугар үлэлээн-хамсаан, хорсун быһыыны, тулуурдаах буолууну, Аҕа дойдуга бэриниилээх буолууну көрдөрбүттэрэ. Кинилэр хорсун быһыылара биһиги өрөспүүбүлүкэбит уонна Бүтүн Россия историятын үйэлэргэ хаалыаҕа», — диэн Айсен Николаев тоһоҕолоон бэлиэтээтэ.
Аахсыйа түгэннэриттэн ЯСИА хаартыскаҕа түһэрээччилэрэ хатаабыт түгэннэрин манна киирэн көрүҥ.
