23 От ыйа 23.07
  • 28°
  • $ 87,78
  • 95,76

Дьокуускайга "Импульс" үлэ ыччат биржата арылынна

17:45, 15 апреля 2016
Текст:
Читайте нас на
Яндекс Новости
ЯДВ

Ыччаты үлэнэн хааччыйар сыалтан тэриллибит «Импульс» үлэ биржата муус устар 15 күнүгэр аанын үөрүүлээх быһыыга-майгыга арыйда. Бу тэрилтэ нөҥүө идэлээх үөрэхтэрин бүтэрбиттэр биир кэлим информациялара эмиэ тиһиллиэ. 


«Биржа сүрүн хайысхатынан ыччат үлэ булунуутугар, эдэр исписэлиистэр тэрилтэлэргэ стажировканы ааһалларыгар, устудьуоннар быстах кэмҥэ үлэлииллэригэр көмөлөһүү, сырдатар-иһитиннэрэр үлэ курдук буолуоҕа. Үс сектордаах: иһитиннэрэр-консультациялыыр, үлэнэн хааччыйыы, үлэ көрдөөччү эдэр киһиэхэ психолог көмөтө», — диэн иһитиннэрэр Дьокуускай куорат нэһилиэнньэ дьарыктаах буолуутун киинин информацияҕа отдела.

Бу киин иһинэн элбэх дьону кытыннарар мероприятиелар буолуохтара: вакансия дьаарбаҥкалара, аһаҕас аан күннэрэ. Маны сэргэ резюме суруйуутугар үөрэтиэхтэрэ, араас дьыалабыай оонньуулар, трениннар ыытыллыахтара.

«Импульс» ыччат биржата СӨ идэлээх үөрэхтээһин, кадры бэлэмнээһин уонна аттарыы министиэристибэтин, СӨ ыччат дьыалаларыгар уонна дьиэ кэргэн политикатыгар министиэристибэни, М.К. Аммосов аатынан ХИФУ карьера киинин, Дьокуускайдааҕы тыа хаһаайыстыбатын академиятын, Арктикатааҕы култуура уонна искусство институтун кытта бииргэ үлэлиир.

Саҥа тэрилтэни «Россиятааҕы устудьуоннар этэрээттэрэ», «Биир ньыгыл Россия Ыччат гвардията» уопсастыбаннай тэрилтэлэр, ХИФУ уопсайдарын холбоһугун Сэбиэтэ, «Отчизна» гражданскай-патриотическай кулууп өйүүллэр.

Үөрүүлээх тэрээһиҥҥэ СӨ бырабыыталыстыбатын бэрэссэдээтэлин солбуйааччы Алексей Дьячковскай, үлэҕэ уонна социальнай сайдыыга миниистири бастакы солбуйааччы Степан Москвитин, ыччат дьыалаларыгар уонна дьиэ кэргэн политикатыгар миниистир Афанасий Владимиров, идэлээх үөрэхтээһин уонна кадрдары бэлэмнээһиҥҥэ, аттарыыга миниистири солбуйааччы Гаврил Семенов кыттыыны ыллылар.

Следите за самым важным и интересным в Telegram-канале и WhatsApp-группе ЯСИА