28 Кулун тутар 28.03
  • -13°
  • $ 92,26
  • 99,71

Дьокуускайдааҕы "Сайсары" ырыынагар ынах арыытын сыанатын СИА суруналыыһа билистэ

Читайте нас на
Яндекс Новости
ЯДВ

Социальнай ситимнэргэ Бааһынай ырыынагар ынах арыыта биир киилэтэ 1000 солк буолбутун туһунан иһитиннэрии тарҕанна диэн суруйан турабыт. Бэҕэһээ СИА кэрэспэдьиэнэ анаан-минээн сыананы билсэ «Сайсары»-га бара сырытта.  

Бааһынай ырыынагар киирэ түһүүгэ баар бастакы лааппыга арыы сыаната 850 солк. турар, атыыһыт этэринэн — Чурапчы арыыта.

Сэргэстэһэ турар миэстэҕэ арыы сыаната 750 солк, атыыһыт эмиэ «Чурапчы арыыта» диэн эрэннэрэр. Сыаната тоҕо уратылааҕый диэтэххэ, «Оҥорон таһаарааччылара тус-туһунан, ол иһин сыана араастаһар», — диэн быһаараллар.

Салгыы «Илгэ» диэн маҕаһыыҥҥа киирдэххэ, сыаната суруллубатах арыы сытара көстөр.

Атыыһыттан арыы сыанатын туоһулаһан билбитим — 1100 солк. «Сип-сибиэһэй Чурапчы арыыта«, — диэтэ.

— Дьон төһө атыылаһарый?

— Ылаллар ини, мин солбукка турабын, — диэтэ.

— Тоҕо манна арыы 1100 турарый, атын сиргэ 850 солк?

Сыана былырыыҥҥыттан маннык үрдээбитэ, — диир.

Иһирдьэ киирдэххэ, «Бүлүү арыыта» диэн 1040 солк турар, кыһыҥҥы арыы буоларын эттэ. «Арыы сыаната ааспыт күһүҥҥэ диэри 650 солк. турбута, онтон ыла сыыйа үрдээн, саҥа дьыл саҕана маннык сыанаҕа тиийбитэ«, — диэн кини кэпсээтэ.

Ааспыт сыл сайыныгар оҥоһуллубут арыы эмиэ 1050 солк турар эбит. «Тоҥ сытар арыы туох да буолбат, амсайан да көр», —  диэн хата атыыһыттар өһүргэнэ сыстылар.

Чурапчы Мугудайын арыыта киилэтэ 850 солк. турар. «Чурапчыга бэйэтигэр даҕаны билигин 700 солкуобайтан чэпчэкигэ арыыны булбаккын», — диэн атыыһыт билиититтэн үллэстэр.

Мииринэйтэн кэлбит кыһыҥҥы арыы 850 солк турар. Арааһа ол иһин быһылаах, олох аҕыйах хаалбыт.

Олохтоох ынах арыыта ыараан, дьон кэлии арыыны ыларга күһэллэр. Холобур, «Мясной двор» маҕаһыыҥҥа кэлии арыы киилэтэ 580 солк турар.

«Бэйэбит сиирбитигэр, дьоммут дэриэбинэттэн атыылаһан ыыталлар. Онтон торт оҥорорбор үксүн Белорусскай арыыны туһанабын. Бары даҕаны ол арыыны ордороллор, кэлин арыы сыаната олус үрдээтэ. Маннааҕы арыынан торт оҥорор буоллахха, киһи барыһырбат эбэтэр торт сыаната биллэ үрдүөн наада», — диэн торт атыытынан дьарыктанар Сахайаана Жиркова үллэстэр.

Элбэх киһи күннээҕи аһылыгар «Молочный дождик», эбэтэр онтон атын арыыны атыылаһар.

Ааптар: Мария Горохова, СИА

Следите за самым важным и интересным в Telegram-канале и WhatsApp-группе ЯСИА