Куорат субуотунньугар бары тэрилтэлэр уонна Дьокуускай куорат дьаһалтата кыттыахтара. Субуотунньук муус устар 22 күнүгэр куорат уокуругун санитарнай ыраастааһын үс ыйдаах чэрчитинэн ыытыллар уонна Саха Өрөспүүбүлүкэтин күнүгэр ананар диэн СИА иһитиннэрэр.
Бары уокуруктарга субуотунньуктар муус устар 14 күнүттэн саҕаламмыттара уонна балаҕан ыйын 30 күнүгэр диэри нэдиэлэ аайы ыытыллыахтара. Ол туһунан Дьокуускай куорат уокуруктааҕы дьаһалтатын территорияларын кытары үлэҕэ департаменыгар иһитиннэрдилэр.
«Куорат дьаһалтата управаларга 18 сиппийэр массыынаны ылан биэрбитэ, бу массыыналары уокуруктарга барыларыгар уонна куорат таһынааҕы бары территориальнай управаларга түҥэппиттэрэ. Хаар ууллуутунан сибээстээн уонна соторутааҕыта элбэх сөҥүү түһэн ууну-чалбаҕы оботторуу күүскэ ыытылла турар. Магистральнай суолларынан МУП «Жилкомсервис» тиэхиньикэтинэн хачайдыыллар, оттон кыбаарталлар уонна тиэргэннэр сирдэригэр управа уонна управляющай хампаанньалар үлэлииллэр. Муус устар 11 күнүттэн 11 717 кубометр ириэрии уутун хачайдаатылар, дьиэлэр тастарыттан уонна кыбаарталлартан күннэтэ 2,5 тыһыынча кубометр ууну оботтороллор», — диэн ДРТ начальнига Владислав Слепцов иһитиннэрдэ.
Муус устар 22 күнүгэр тэрилтэлэр кинилэргэ сыһыаннаах территорияларын хомуйуохтара. Сыһыарыылаах территориялар испииһэктэрэ Дьокуускай куорат дьаһалтатын 2021 с. от ыйын 7 күнүгэр тахсыбыт «Дьокуускай куорат «куораттааҕы уокурук сиригэр- уотугар тэрилтэлэр куратордарын туһунан» диэн 161 №- дээх уурааҕынан быһаарыллыбыта.
