Дьон өлүүлэһэн тутууга харчыларын уган баран, мөлтөх үлэлээх тутуу хампаанньаларыттан сылтаан, илии соттон хаалаллара өрүү тахсыталыыр.
Судаарыстыба албыннаппыт дьоҥҥо, төһө кыалларынан, көмөлөһө сатыыр.
Бу күннэргэ СӨ бырабыыталыстыбатын бэрэссэдээтэлин 1-кы солбуйааччытын э.т. Кирилл Бычков иһитиннэрбитинэн, «Монолит-Строй” уонна “Симиир” тутуу тэрилтэлэрэ албыннаабыт 99 киһиэхэ көмө харчы көрүлүннэ.
«ДОМ.РФ уонна дьиэни атыылаһыыга өлүүлэспит дьон бырааптарын көмүскүүр пуонда мунньахтарыгар кытынным. Кыһалҕаламмыт дьиэлэр тутууларын түргэтэтэргэ, албыннаппыт дьон бырааптарын чөлүгэр түһэриигэ уонна дьиэлэри тутууга сүрүн оруолу ылар инфраструктураны оҥорууга сөптөөх болҕомтону уурар туһунан кэпсэттибит, дьүүллэстибит», — диэн Кирилл Бычков социальнай ситимҥэ кэпсээбит.
Саха сиригэр дьиэни атыылаһыыга албыннаппыт өлүүлээхтэр кыһалҕаларын быһаарыыга сөптөөх үлэ тохтообокко ыытыллар. Урукку өттүгэр баар кыһалҕаҕа өрөспүүбүлүкэ бүддьүөтүттэн көмө оҥоһуллааччы. Билигин бу уларыйан турар.
Былырыыҥҥыттан өрөспүүбүлүкэ бастакынан кэриэтэ федеральнай үбүлээһин «пилотнай бырайыагар” киирбитэ. Итинэн сибээстээн, СӨ бырабыыталыстыбата уонна тустаах пуонда бииргэ үлэлээн, 660 мөл. солк. тыырыллан, албыннаппыт өлүүлээх 320 киһиэхэ көмө оҥоһуллара ситиһилиннэ.
Источник: https://www.sakhaparliament.ru/sa/ekeniemike/tutuu/1034-diete-suokh-khaalbyttarga-k-m-k-r-l-nne
