27 Ыам ыйа 27.05
  • -7°
  • $ 104,68
  • 115,6

Дабааннар ууларын ситимэ холбонно

Дабаан нэһилиэгэр от ыйын 14 күнүгэр локальнай уу ситимэ үлэҕэ киирдэ. 2017 сылтан тэрээһин үлэтэ саҕаламмыт улахан эбийиэк ууну ыраастыыр ыстаансыйата от ыйын 22 күнүгэр боруобалаан холбонууну ааста. Сайыҥҥы үлэлэр тустарынан баһылык Валентина Жирохова кэпсээтэ.


Өлүөхүмэ улууһун биир кытыы нэһилиэгэ Дабаан кыстыкка бэлэмнэнэр. Быйылгы дьылга окко былаан 1235 туонна. Баһылык Валентина Александровна эппитинэн, үүнүү үчүгэй, онон былааны толорор соруктаахтар. Дьон окко киирбитэ эрээри, уһун ардах кэлэн, күн-дьыл тупсарын кэтэһэллэр.

Үүккэ былаан 80 туонна. Нэһилиэккэ 20-тэн тахса ыал туттарар. Кинилэр күн аайы туруоруллубут ирдэбиллэри тутуһаллар, кыраапыктан хаалыы суох.

От ыйын 22 күнүгэр локальнай уу ситимин ууну ыраастыыр ыстаансыйатын үлэлэттилэр. Олохтоохтор өр күүппүт эбийиэктэрэ үлэҕэ киирэн эрэриттэн үөрэллэр. Улахан дьаһал “Ыраас уу” федеральнайдааҕы бырагырааманан ыытыллар. Хас күн аайы киэһэ өттүгэр бириэмэнэн уу дьоҥҥо тириэрдиллэр.

Муниципалитекка ырааһырдыы, тупсарыныы үлэтэ бары хайысханы хабан ыытыллар. Ол курдук, от ыйын саҕаланыытыгар көнөпүлэни уодьуганныырга аахсыйалар биллэриллибиттэрэ, барыта 35 кв.м. иэннээх сир ыраастаммыта. Билигин иккис түһүмэҕин ыытарга бэлэмнэнэллэр.

От ыйын 2 күнүттэн оскуола оҕолоро – волонтердар “Ыраас биэрэк” тэрээһиҥҥэ кыттан, биэрэги ыраастаабыттар, кураан күҥҥэ сибэккигэ уу куталлар, бөх хомуйаллар.

Кыайыы 75 сылыгар Дабаантан Аҕа дойду улуу сэриитигэр барбыт алта быраат Хохоловтарга анаан Кыайыы скверыгар пааматынньык туруорулунна.

Салайааччы иһитиннэрбитинэн, баһаары утары, сөтүө кэмигэр куттал суоһаабатыгар итиэннэ  коронавируһу тарҕаппат буолууга миэрэлэр кытаанахтык тутуһуллаллар.

Следите за самым важным и интересным в Telegram-канале и WhatsApp-группе ЯСИА
0
0