Сунтаар улууһугар анал байыаннай дьайыыга сулууспалыы сылдьар уолаттар дьиэ кэргэттэригэр араас хайысхалаах көмө оҥоһуллар. Биир нэһилиэк холобурунан туох үлэ барарын ырытан көрүөҕүҥ, суруйда улуус дьаһалтатын пресс-сулууспата @suntaar_ulus.
Дьаархаҥҥа барыта 5 уол быстах хомуур саҕаланыыта ыҥырыллан барбыттара. Нэһилиэк тута бүттүүн түмүллэн, маһынан, мууһунан көмөнү быыстала суох ыыталлар. Ону тэҥэ идэһэлэрин дьаһайалларыгар эмиэ көмөлөспүттэрэ.
Оттон «Саха сирин ийэлэриттэн, тапталы кытта» акцияҕа кыттыһан нэһилиэк иистэнньэҥ ийэлэрэ сылаас жилеты, наскыны, тэллэҕи тигэн кулуупка аҕалан туттараллар. Бу тапталынан тигиллибит маллар уолаттарга, биһиги баарбытын, кинилэринэн киэн туттарбытын биллэрэн, Дьокуускайга суһал штабка тиийиэҕэ. Салгыы сулууспаҕа сылдьар уолаттарбытыгар айанныаҕа.
Маннык көмөнү оҥоруу ытык иэспит диэн санаанан, хас биирдии киһи кыттыһан күргүөмнээх үлэ барар. Маны таһынан, оттук маһынан кыстаан олорбут биир ыалга киин ититиини холбоотулар. Оҕо уһуйааныттан барыта 180 миэтэрэ уһуннаах турбаны тардан буор босхо сылааһы биэрдилэр. Кинилэр уоллара хомуур саҕаланыыта барбыта. Билигин анал байыаннай дьайыыга сулууспалыы сылдьар.
Бу курдук дьоҕус нэһилиэккэ күргүөмнээх, көдьүүстээх үлэ барар. Маннык дьаһаныы улуус бары нэһилиэктэригэр балаһыанньа көнүөр диэри салҕаныаҕа.
