Олоҥхо ыһыаҕын бастакы 10 сылын түмүктүүр, иккис эргиирин саҕалыыр Х-с Олоҥхо Ыһыаҕын тэрээһиннэрэ бэҕэһээҥҥиттэн Дьааҥы кырдьаҕас куоратыгар саҕаланнылар.
Улуус бары олохтоохторо өр күүппүт Илиҥҥи Биллээҕи үрэҕи туоруур тимир-бетон муоста айанньыттарга арылынна.
Михаил Новгородов аатынан куорат орто оскуолатын аактабай саалатыгар ыһыаҕы көрсө тахсыбыт кинигэлэр сүрэхтэниилэрэ буолла. Бу күн барыта 18 кинигэ мустубут дьоҥҥо билиһиннэрилиннэ. Бэлиэ түгэни култуура уонна духуобунай сайдыы миниистирин солбуйааччы Н.А. Макаров арыйда. Кини кэнниттэн ХИФУ бэрэпиэссэрэ В.В. Илларионов, Олоҥхо үнүстүтүүтүн научнай үлэһитэ Р.Н. Анисимов уо.д.а. бэйэлэрин санааларын эттилэр.
Бэҕэһээ киэһэ саҥардыы хапытаалынай өрөмүөнэ бүппүт Култуура киинигэр Төрүт хотугу олохтоохтор тыйаатырдарын артыыстара бэртээхэй кэнсиэр бэлэхтээтилэр.
