17 Тохсунньу 17.01
  • -48°
  • $ 73,82
  • 83,32

Дьааҥыга айан суолугар тахсыбыт мэһэй ыһыахчыттарга харгыһы үөскэппэтэ

21:37, 28 июня 2016
Текст:

Дьааҥыга үс күнү быһа субуруччу ардах түһэн, оройуоҥҥа халааннаан эрэрин, ыһыах ыытыллара уустугурбутун туһунан сурах-садьык ватсап социальнай ситимҥэ тарҕаммыта. Ити эрээри дьиҥнээҕэ хайдах этэй? Суруналыыс Елена Потоцкая бэлиэтээһиннэри оҥордо.


Кырдьык, бэнидиэнньик күн үс бастакы көтөр аалы күн-дьыл мөлтөҕүнэн үс-түөрт чаас Дьокуускай пордугар көтүүтүн тохтото сылдьыбыттара. Онтон халлаан көнөн, утуу-субуу сөмөлүөттэр айаҥҥа туруммуттара. Оройуон кыраныыссатыгар чугаһаан иһэн үөһэттэн көрдөххө, уу-хаар Дьааҥы сирин бүтүннүүтүн ылбыта харахха быраҕыллара.

Аара Баатаҕайтан кэлэн иһэн, ыалдьыттары толору тиэммит биэс бастакы оптуобус Арҕаа уонна Илин Биллээх үрэхтэри төлө көппүттэрэ. Онтон киэһэ 6 чаас диэки бу үрэхтэр уулара хааларыттан тахсан, муосталары тоҕо көтөн, айан суола быстан хаалбыта. Ол түмүгэр оройуон үгүс тэрилтэлэрэ, ыалдьыттары көрсөр нэһилилиэктэр хаайтаран хаалан, ыксааһын баар этэ.

Ити эрээри улуустар дэлэгээссийэлэрэ эрдэ кэлбит буолан, Олоҥхо ыһыаҕын параадыгар бука бары кыттыбыттара – ураты көстүү!

Оройуон дьаһалтатын баһылыга Виктор Павлов үөскээбит балаһыанньаны тута болҕомтоҕо ылан, хаайтарбыт дьону вертолетунан таһарга быһаарыы ылыммыта. Вертолеттар күнү быһа 20-лии мүн. буола-буола 22-лии киһини ыһыахтыыр түһүлгэ аттыгар баар былаһааккаҕа аҕалан түһэртэлээбиттэрэ. Онон айан суолугар тахсыбыт мэһэй ыһыахчыттарга харгыһы үөскэппэтэ.

Бэҕэһээ киэһэ 7 чаастан грейдеринэн ыһыахтыыр түһүлгэ бадарааннаах сирдэрин анаан тэҥнээн, онно күөх оту тэлгэтэн, сарсыарда 11 чааска Олоҥхо ыһыаҕа ыытыллар түһүлгэтэ ыалдьыттары уонна тэрээһин кыттыылаахтарын чээлэй күөх сирэмнээх хонуунан көрсүбүтэ.

Олоҥхо ыһыаҕа сайыҥҥылыы ып-ыраас халлааҥҥа ыһылынна. Оттон дьааҥылар айылҕа уустук балаһыанньаны үөскэтиитин, санааларын күүһүнэн кыайбыттара өргө диэри уос номох буолан, кэпсэлгэ сылдьыаҕа.

0
0
17 января 17.01
  • -48°
  • $ 73,82
  • 83,32