22 Ыам ыйа 22.05
  • -7°
  • $ 104,68
  • 115,6

Дьааҥы Остоолботооҕу "Күүлэйигэр" 38 туонна от оттонно

15:02, 26 июля 2021
Текст:

От ыйын 23-24 күннэригэр Дьааҥы улууһун Остоолбо сирин Улахан Сыһыытыгар Арассыыйа былааҕын күөрэччи тутан күргүөмнээх «Күүлэй-2021» ыытылынна. Быйылгы күрэххэ уопсайа 8 хамаандаҕа 40 киһи кытынна. Күрэх оройуон ынах сүөһү ииттэр саамай улахан хаһаайыстыбата «Алгыс» ТХПК пиэрмэтин сүөһүтүн кыстатан таһаарарга ананна.


Быйаҥ сирдээх, оттоох Остоолбо нэһилиэгин Улахан Сыһыытыгар хаһыс да сылын ыытыллар улахан тэрээһиннээх от күрэҕэр Верхоянскай куорат «Тымныы Чыпчаала» ТХПК икки хамаанданы, Остоолбо, Адыаччы биирдии хамаанданы уонна Верхоянскай куорат, Баатаҕай бөһүөлэгин уонна оройуон дьаһалталара биирдии хамаанданы туруордулар. Маны таһынан оройуон тыатын хаһаайыстыбатын салалтата суокка киирбэт биир хамаанданы туруорда. Балаһыанньа быһыытынан хамаандаларга иккилии мотокоса, үстүү харбааччы (хамаандаҕа икки дьахтар, үс эр киһи) ирдэммитэ.

Күрэх оройуон ынах сүөһү ииттэр саамай улахан хаһаайыстыбата «Алгыс» ТХПК пиэрмэтин сүөһүтүн кыстатан таһаарарга ананна. Оройуон баһылыга Гаврил Чириков күрэх кыттааччыларын эҕэрдэлээн туран, ыччат уонна орто саастаах дьон окко кыттыыта улаханын бэлиэтээтэ, сүөһү тымныы уһун кыһыны, кыстыгы этэҥҥэ туораан тахсарыгар төһүү күүс буолалларыгар махтанна.

Бу үтүө тэрээһини аан бастаан көҕүлээччи «Тымныы чыпчаала» ТХПК салайааччыта Екатерина Портнягина быйыл от үүнүүтэ үчүгэйин бэлиэтээтэ, онон быйыл окко 450 туонна былааны толороруохтаахтарын, от күүлэйин тэрийии улахан көмө буоларын эттэ.

Былырыын окко балаһыанньа кырыымчык да буоллар, «Тымныы чыпчаала» ТХПК Эбээн Бытантай оройуонугар 20 туоннаны, Адыаччыга 10 туонна от биэрэн көмөлөспүтэ. Дьааҥылар былыр былыргыттан ынах сүөһүнү баччааҥҥа диэри иитэн кэлбит улуус буолан, иитэр сүөһүтүн энчирэппэккэ илдьэ сылдьар.

«СӨ Бэрэсидиэнэ Айсен Николаев Дьааҥы улууһугар быйыл саха ынаҕын аҕалар этиитин ынах-сүөһү иитэр хаһаайыстыбалар ордук сэргээтибит», — диир Екатерина Портнягина.

Сайын ахсын Дьокуускайтан сынньана кэлэр 74 саастаах Валентина Васильевна Слепцова «Төрөөбүт дойдубар кэлэн күүс-сэниэ ылан, сынньанан дуоһуйан барабын. Кэтээн көрөрбүнэн — сыл ахсын уончалыы биригээдэ кэлэн кыттарыттан, дойдум дьоно олус көхтөөҕүттэн үөрэбин. Екатерина Алексеевна бу ыытар күрэхтэригэр бары усулуобуйаны барытын тэрийэр, аһа-таҥаһа дэлэйэ. От үүнүүтэ улахан буоллаҕына элбэх сүөһү этэҥҥэ кыстаан тахсар буоллаҕа», — диир.

Ыраах-чугас нэһилиэктэртэн түмсүбүт күрэхтэһээччи оччуттар уйаара-кэйээрэ көстүбэт киэҥ Улахан сыһыыга киириэх иннинэ, омурҕаҥҥа уонна үлэ кэнниттэн чахчы сахалыы дэлэгэй, тотоойу астаах түһүлгэҕэ төгүрүччү олорон от үлэтэ хаамыытын, кэлэр күрэхтэргэ хамаанда туруоран кыттар баҕалаахтарын туһунан кэпсэтэллэр.

Верхоянскай куорат хамаандатын салайан аҕалбыт Степан Владимирович Васильев «Быйыл бастакыбытын кыттабыт. Эһиил үчүгэйдик оҥостон, түмүгү ситиһэрдии оҥостон кэлиэхпит. Быйыл көрө-билэ кэллибит», — диэн санаатын үллэстэр.

«Улуус үрдүнэн ааспыт сыл 10 тыһ туонна былаан турбут эбит буоллаҕына, быйыл 8685 тыһ туонна туруорулунна. Билигин 620-чэ киһи оттуу сылдьар. От күүлэйигэр 25 га сир охсуллан, 38 туонна оттонно», — диир оройуон тыатын хаһаайыстыбатын начальнигын солбуйааччы Евдокия Платоновна Слепцова.

Икки күннээх от күрэҕин түмүгүн таһаарыы хамыһыйатыгар Остоолбо нэһилиэгин тыатын хаһаайыстыбатын исписэлииһэ Николай Николаевич Горохов, Адыаччыттан тыа хаһаайыстыбатын исписэлииһэ Игорь Николаевич Захаров уонна «Авиалесоохрана» салайааччыта Дмитрий Николаевич Юмшанов үлэлээтилэр. Күрэх түмүгүн иһитиннэрии үөрүүлээх чааһыгар тэрийээччи Екатерина Алексеевна күрэх кыттааччыларыгар уонна бу быйаҥнаах сирдээх Остоолбо нэһилиэгин бар дьонугар махталын этэн туран, кыайыылаахтарга харчынан бириистэрин туттарда. Бу үтүө тэрээhиннээх үлэ бырааhынньыгар кыттыбыттарга уонна дэлэй аhы тэрийээччилэргэ Дария Стручковаҕа, Галина Поповаҕа, Валентина Слепцоваҕа харчынан бириэмийэлэри туттартаата.

I миэстэни хаһыс да сылларын инники күөҥҥэ сылдьар, Остоолбо нэһилиэгин отчут уолаттарын хамаандата ылан, 80 тыһыынча харчынан бириэмийэлэннэ. Хамаанда хамандьыыра Дьуһаал Горохов.

Кинилэри тилэх баттаһан, II бириистээх миэстэҕэ «Тымныы чыпчаала» бастакы хамаандата тахсан, 60 тыһыынчанан бириэмийэлэннэ, хамаандыыр Иван Слепцов. III миэстэҕэ саамай хааччыстыбалаахтык оттообут Владимир Юмшанов хамандыырдаах Адыаччы хамаандата тахсан, 30 тыһыынчанан бириэмийэлэннэ.

Маны кытта сорох хамаандалар уонна биирдиилээн бастыҥнар бары бэлиэтэннилэр. Күрэх кыттааччылара аны аҕыйах күнүнэн ыытыллыахтаах ыччат оройуоннааҕы «Күүлэй-2021» күрэҕэр кыттыан баҕалаахтарын иһитиннэрдилэр.

Следите за самым важным и интересным в Telegram-канале и WhatsApp-группе ЯСИА
0
0