18 Ыам ыйа 18.05
  • -7°
  • $ 104,68
  • 115,6

Дьааҥы Адыаччытыгар үс толору механизированнай биригээдэ оттуур

17:01, 02 сентября 2021
Текст:

Адыаччы нэһилиэгин ходуһаларыгар үс толору механизированнай биригээдэ оттуур. Маҕыллаҕа Сергей Петрович Потапов бааһынай хаһаайыстыбата толору механизированнай оттооһуну тэриммитэ үһүс сыла. Быйыл киниэхэ Арыылаахтан икки тырахтарыыс дуогабар быһыытынан тиийэн оттуу сылдьаллар.


Сергей Петрович бэйэтин сылгы иитэр хаһаайыстыбатыгар оттуурун таһынан, оройуоҥҥа эбии от бэлэмнээһинигэр үлэлэһэр. Маҕыллаҕа ыраах айаннаах, быйаҥнаах сиргэ урут сопхуос саҕана улахан биригээдэлэр тэриллэн оттууллара. Уу улааттаҕына таһаарар сирэ да буоллар бэйэлэрин күүстэринэн, саас, кэмигэр, мелиорация үлэтин ыыталлар, нээкирик оҥороллор. Сергей Петрович сылгыһыттарын, отчуттарын үлэлиир усулуобуйаларыгар болҕомто уурар. Аҕыйах сыллааҕыта икки этээстээх дьиэ тутан киллэрбитэ.

Иккис толору механизированнай биригээдэ Алыһардаахтар — Юрий Юрьевич Борисов уонна Александр Гаврильевич Потапов хаһаайыстыбалара кыттыһан оттуур тиэхиникэни ылыммыттар. Ааспыт сыл охсор тыраахтары, оттон быйыл японскай от пресстиир, харбыыр тэриллэри ылыммыттар. Уолаттар «junior 900» оттуур тиэхэникэлэригэр үөрэнэн, хайгыыллар.

«Тиэхэникэлэрэ күҥҥэ 100-түү киилэ ыйааһыннаах сүүсчэкэ рулону оҥорон таһаарар. Ыйааһынын биэриитэ сир хайдах оттооҕуттан уонна баайыытыттан, хайдах тардыллыытыттан тутулуктаах дииллэр. Бу ходуһаларын бүтэрэн, балай да улахан — 200-чэ центнер от кэлэр иэннээх ходуһалаах Түбэҕэ салгыы оттуу бараары сылдьаллар. Билиҥҥи туругунан 150 –кэ центнери оҥорбуттар. Тиэхиникэ бэйэтин көлүөһэтэ кыра соҕус буолан, батылла сылдьарыттан, иномарка көлүөһэтин олордубуттар. Тиэхиникэнэн оттооһуну үчүгэйдик баһылаатахпытына, инникитин окко наадыйар дьоҥҥо оттоон биэрэр былааннаахпыт дииллэр», — диэн сырдатар баһылык солбуйааччыта Валерий Николаевич Стручков.

«Баачаан» ХЭТ дириэктэрэ Владимир Христофорович Чириков саҥа тыраахтар уонна от пресстиир, харбатар, охсор тэрил аҕалан, Адыаччы Мас Ураһатыгар саҥа толору механизированнай биригээдэ тэриллэн, от ыйын 27 күнүттэн от охсуутун саҕалаабыта. Адыаччыттан уопуттаах тырахтарыыс Ньургун Прокопьевич Юмшанов наставник быһыытынан саҥа тэрили тиийэн үөрэтэр. Биригээдэ звеньевойа Василий Слепцов уонна Михаил Слепцов бу сааскыттан хаар быһыты оҥорон, ханааба хаһан үлэлээбиттэрэ, мелиоративнай үлэлэргэ бырагыраама наадатын этэллэр. Инникитин мобильнай биригээдэ буолар былааннаахтар. «Баачаан» хаһаайыстыба быйыл окко 100 туонна былааннаах.

Следите за самым важным и интересным в Telegram-канале и WhatsApp-группе ЯСИА
0
0