Усуйаана улууһугар Дьүкээгиргэ уонна Уйаандьыга библиотека тэриллэр буолла. Штат көрүлүннэ.
Санатар эбит буоллахха, Дьүкээгиртэн Алексей Егорович Григорьев, Уйаандьыттан Елизавета Дмитриевна Цыпандина ааттара библиотека арыллыытын туһунан мунньахха ахтылынна. Кинилэр баҕа санаалара – бөһүөлэккэ библиотеканы тэрийбит киһи диэн буолара. Елизавета Дмитриевна Уйаандьыга общественнай библиотека тэрийэ сылдьыбытын билэбит. Алексей Егорович үлэлиир бириэмэтигэр хонтуоратыгар куруук сибиэһэй хаһыаты, кинигэни аҕалан аахтарааччы.
«Онон барҕа махталбытын тиэрдиэхпит этэ улуус Советын депутаттарыгар, ону таһынан улуустааҕы кииннэммит библиотека директорыгар Т.Я. Семеноваҕа. Оройуон библиотекатын кытта аны мэлдьи сибээстээх буолуохпут диэн үөрэбит, бдьоҥҥо кинигэнэн көмөлөһүөҕэ диэн улахан эрэлбитин уурабыт«, — «Заря Яны» хаһыакка Семен Ребров суруйда.
Улуус Советын депутаттара дьиҥ санааларын-өйдөрүн саамай ыраах нэһилиэктэргэ туһаайан аныгылыы быһаарыныыны ылбыттара бэлиэтэннэ.
