Чурапчы үрдүк дьолугар үөскээн ааспыт Майн Кениг (Mein König) — Саха сирин ат успуордун эйгэтигэр номоххо киирбит, Англия ыраас хааннаах сүүрүк сылгыта. Кини суох буолбута бүгүн о.э атырдьах ыйын 5 күнүгэр – 1 сыла туолла. Аатырбыт сүүрүгү ипподромҥа көрөөрү тыһыынчанан киһи мустара, Майн Кениг диэн аат ньиргийэн олороро, кыраһыабай сүүрүүтэ, кылбар кыайыылара, быыппастыгар былчыҥнардаах быһыыта-таһаата сахалар сүрэхтэрин букатыннаахтык сүүйбүтэ. Үйэҕэ биирдэ эрэ үөскээн ааһар быһый дьылҕата, төһө да кылгаһын иһин, чаҕылхай уонна олус сырдык этэ.
Төрүтэ уонна Саха сиригэр кэлиитэ
Майн Кениг 2016 сыллаахха Краснодарскай кыраайга баар «711» диэн ааттаах племенной ат собуотуттан атыылаһыллыбыта. Ол сыл кинини балаҕан ыйыгар Саха сиригэр аҕалбыттара. Сылгыны Чурапчытааҕы тыа хаһаайыстыбатын кээпэрэтиибэ атыыласпыта. Итиэннэ каинини өр сылларга тириэньэр Дмитрий Осипов эрчийбитэ.
Фенотип (тас көрүҥэ)
Английскай боруода буолан, Майн Кениг суххай быһыылаах-таһаалаах, күүстээх былчыҥнардааҕа. Дьүһүнэ хараҥа күрэҥ этэ, маҥан бэлиэлэрэ суоҕа.
Ситиһиилэрэ
Кини Саха сирин ипподромнарыгар тахсыбыт саамай бастыҥ сүүрүктэртэн биирдэстэрэ буолар. Кини Саха сирин ипподромугар барыта холбоон 36-та стартаабыта олортон 21-гэр кыайыылаах, 8-та үрүҥ көмүс, 5-тэ боруонса мэтээли аҕалбыта.. Манчаары оонньууларын 2 төгүллээх, Лээги Кубогун муҥутуур кыайыылааҕа.
2020 сыл: Дьокуускай куорат ипподромугар 2000 миэтэрэ дистанцияны 2 мүнүүтэ 10 сөкүүндэнэн кэлэн, абсолютнай рекорду олохтообута. Бу көрдөрүү билигин даҕаны куоһарылла илик;
Ил Дархан бирииһэ: Майн Кениг Ил Дархан бирииһигэр үс төгүл муҥутуур кыайыылааҕынан биллибитэ.
Бастыҥ ааты сүгүү: Кини түөрт төгүл субуруччу (2017, 2019, 2020, 2021 сылларга) Саха Өрөспүүбүлүкэтин бастыҥ сүүрүк ааты ылбыта.
Аат суолтата
«Майн Кениг» ньиэмэс тылыттан тылбаастаатахха, «Мин хоруолум» диэн суолталаах. Маннык дьоһуннаахтык ааттаммыт сылгы кини таһымын, хаачыстыбатын уонна бас билээччилэрин сыанабылларын толору көрдөрөрө.
Майн Кениг саха усулуобуйатыгар үрдүк кылаастаах соҕуруу дойду сүүрүктэрэ хайдах курдук табыгастаахтык киирэллэрин чаҕылхай холобура буолар. Кини рекордтара уонна кыайыылара Саха сиригэр ат успуорда сайдарыгар улахан суолталаах хардыынан буолбута. Кэлин кини успуорт карьератын бүтэрэн баран удьуору салгыыр аналлаах племенной ат быһыытынан сылдьан былырыын, 2025 сыллаахха этиҥнээх ардахтаах күн, мас анныгар туран чаҕылҕаҥҥа оҕустаран сырдык тыына быстыбыта. Саха сиригэр ас успуордун сэҥээрээччилэрэ, Үөһээ Дьааҥыга тиийэ сылгыны иитээччилэр кини өлбүт сураҕын улаханнык соһуйа, курутуйа истибиттэрэ. Китни сырдык аатын кэриэстээн Бөтүгүттэ алааһын ипподромугар ытык сэргэ туруоруллубута. Күүстээх быһый аата үйэлэргэ умнуллубат!
Ааптар: Сэмэн Жендринскэй
