Саха сиригэр оттооһун салҕанар. 350 тыһыынча туонна от кэбиһиллэн, былаан 74 % туолла. Айсен Николаев бэҕэһээ Чурапчыга сырыытын кэмигэр сүөһү аһылыгын бэлэмнээһин хаамыытын билистэ диэн, Ил Дархан уонна Бырабыыталыстыба пресс-сулууспата иһитиннэрэр.
Өрөспүүбүлүкэ баһылыга Хатылы нэһилиэгэр “Попов М.Д.” бааһынай хаһаайыстыба ходуһаларыгар сырытта уонна өрөспүүбүлүкэ миниистирдэрин уонна муниципалитет бэрэстэбиитэллэрин кытта мунньахтаата.
Тыа хаһаайыстыбатын миниистирэ Александр Атласов өрөспүүбүлүкэ үрдүнэн 350 тыһыынча туонна от кэбиһиллэн, былаан 74 % туолбутун иһитиннэрдэ. Чурапчы улууһугар сүрүн ходуһалар оттонон буппүттэр, билигин мобильнай биригээдэлэр ыраах учаастактарга оттуу бараллар. Күһүн бүтүөр диэри оройуон 91-93% оту бэлэмниир соруктаах.
Мунньахха нэһилиэктэр баһылыктара уонна фермердэр мелиорация тиһигин чөлүгэр түһэрэри уонна сэбиэскэй кэмҥэ туһаныллыбыт ыраах ходуһалары оттууру туруорустулар. Маныаха элбэх үп-харчы уонна күүстээх тиэхиньикэ наадатын эттилэр.
Ону сэргэ кинилэр оту улуус иһигэр да, таһыттан да тиэйиигэ көмө көрдөөтүлэр. Билигин хас да биригээдэ Өлүөнэ 4 арыытыгар оттуулларын, кыһын ол оттору тиэйиигэ элбэх дизельнэй уматык ирдэнэрин эттилэр.
Айсен Николаев бырабыыталыстыба оту тиэйии ороскуотун толуйууга үбү көрүө диэтэ. Өрөспүүбүлүкэ баһылыга бу күһүн мелиорация тиһигин чөлүгэр түһэрии боппуруостарыгар киэҥ ыҥырыылаах мунньаҕы тэрийэргэ соруйда.
“Өрөспүүбүлүкэ тыатын хаһаайыстыбатыгар үгүс сыллар устата самалык салааҕа курдук сыһыаннаһан кэллилэр. Бүгүн Саха сирин тыа хаһаайыстыбатын бородууксуйатын оҥорон таһаарааччылара бэйэлэрин кыахтарын билинэн, сайдарга күүскэ үлэлэһэллэр. Биһиги кинилэри өйүөхтээхпит”, — диэтэ Айсен Сергеевич.
Ил Дархан чугастааҕы сылларга сүөһү ахсаанын элбэтэр сыалтан үүт уонна эт оҥоһуутун үбүлээһин 1,5 төгүл үрдүөхтээҕин эттэ.
Чурапчылар Айсен Николаевка тыа хаһаайыстыбатын сайыннарар ааҕыныстыба бырайыагын кэпсээтилэр. Тэрилтэ тыа хаһаайыстыбатын оҥорон таһаарааччыларыгар мэтэдиичэскэй, юридическэй, экэнэмиичэскэй уонна иһитиннэрэр көмөнү оҥоруохтаах. Ил Дархан бырайыак улууска ситиһиилэннэҕинэ атын оройуоннарга тарҕатыахха сөбүн эттэ.
