26 От ыйа 26.07
  • 23°
  • $ 85,41
  • 93,17

Чурапчы нэһилиэгэр Афанасий Софронов аатынан спорт уораҕайа эһиил үлэҕэ киириэҕэ

12:03, 17 ноября 2023
Читайте нас на
Яндекс Новости
ЯДВ

Урукку сылларга Чурапчы нэһилиэгин спортивнай арочнай саалата улам эргэрэн, нэһилиэк дьаһалтатын туруорсуутунан, улуус дьаһалтатын өйөбүлүнэн саҥалыы бырагыраамаҕа киирэн, тутуу үлэтэ тэтимнээхтик ыытыллар.

Дойду Бэрэсидьиэнэ Владимир Путин кэлэр дьылы – Спорт сылынан биллэрдэ, ити бэлиэ даатаҕа сөп түбэһиннэрэн, Чурапчы нэһилиэгин дьаһалтата Афанасий Кирикович Софронов аатынан спортивнай саалатын үлэҕэ киллэрээри бэлэмниир. Бу туһунан бүгүн Чурапчы нэһилиэгин баһылыга Владимир Дмитриевич Сивцевы кытары кэпсэтиибитин таһаарабыт.

Владимир Дмитриевич, төһө иэннээх уонна суумалаах спорт уораҕайа тутулла турарый?

Техническэй – экономическэй  көрдөрүүлэр:

Дьиэ уопсай  иэнэ – м2  1692,38
Тутуу уопсай  иэнэ – м3   11939,39
Тутуу сабардама  — м2  1396,25
Туттуллар иэнэ – м2  1633,80
Былааннаах   иэнэ – м2  1506,29
Этээһэ – 2
Сирин иэнэ – 0, 5980 га

Сметанан    суумата:

2023  сыл  1-гы  кыбаартал  туругунан   НДС–нан  туран,  232 000 000 мөл. солк., ( түмүк № 14 – 1- 1- 3- 077607- 2021, 15. 12. 2021 с.)

2021  сыл  2-с  кыбаартал  туругунан бэдэрээччит “Востокстрой”  ХЭТ   Саха  өрөспүүбүлүкэтин Чурапчы  улууһун, Чурапчы  нэһилиэгин  кытта  “А.К. Софронов  аатынан  Култуурунай – спортивнай комплексы”   бастакы түһүмэҕин  тутар  туһунан  дуогабары  түһэрсибиттэрэ.

Бастакы түһүмэххэ  киирэр: вертикальнай  былааннааһын, акылааты  цокольнай  матырыйаалынан  бүрүйүү, муоста  аннын (хара) муосталааһын.  21 667,714 тыһ.солк. суумаҕа хантыраак түһэрсиллибитэ. Үбүлээһин  Чурапчы  нэһилиэгин   дьаһалтатын  олохтоох  бүддьүөттэн  көрүллүбүтэ.

Быйыл сайын, тутуу 2-с  түһүмэҕэ   саҕаламмыта.  Тутууну  “Сибтранстрой” ХЭТ  чааһынай инвестор  ыытар  уонна үбүлүүр. Күн бүгүн  тутуу  уопсайа 67% бэлэм турар. Биригээдэ мантан  кыһын  үлэлииригэр  тутуу   матырыйаалынан  толору  хааччыллан олорор. Үлэтэ үүнэр сылга, тохсунньу 24 күнүгэр түмүктэнэн үлэҕэ  киирэрэ  былааннанар.

Биир дьарыкка төһө киһи хабыллан сылдьыан сөбүй итиэннэ ыспартыыбынай инбэнтээринэн толору хааччыллар дуо?

Саха Өрөспүүбүлүкэтин Ил Дарханын Айсен Николаев быһаччы дьаһалынан Спорт уонна физическэй култуура министиэристибэтэ былаан быһыытынан  толору инбэнтээринэн хааччыйыахтаах, биир кэмҥэ 100-150 киһи дьарыктаныан сөп.

Спорт саала хас хайысханан үлэлиэҕэй?

Бу спортивнай саалабыт, бастатан туран, нэһилиэк олохтоохторун саалата буолар. Онон биир хайысхалаах буолбакка,  нэһилиэнньэ киэҥ араҥатын барытын хабан үлэлиэхтээх. Урукку сылларга кроссфит, фитнес, аэробика, остуол тенниһэ, дуобат, саахымат, доруобуйаҕа туһалаах илиҥҥи  биирдиилээн киирсии көрүҥэ генсинкан, эрчиллэр саала үлэлээн кэлбиттэрэ, кэлэр  2024 сыл Дойдубут Бэрэсидьиэнэ Владимир Путин Спорт сылын биллэрэринэн, нэһилиэнньэҕэ туһалаах араас, сарсыардааҥы эти-хааны уһугуннарар сэрээккэлэртэн саҕалаан маассабаһы хабан былааннаахтык үлэлиэхтээх.

Нэһилиэккэ чэгиэн-чэбдик олоҕу тутуһарга анаммыт анал бырагыраама үлэлиир дуо?

2017-2023 сылларга «Развитие физической культуры и спорта, формирования здорового образа жизни населения в МО «Чурапчинский наслег» диэн муниципальнай бырагыраама үлэлээтэ.

Улахан спорт бырааһынньыгын ыытарга сөптөөх киин буолар дуо?

— Бу саҥа киирээри турар спорт саалатыгар 812 квадрат иэннээх, 33 миэтэрэ уһуннаах, 24 миэтэрэ туоралаах аныгы олоххо эппиэттиир спортивнай оонньуур саалалаах буолар, онно волейбол, мини футболунан дьарыктанарга, өрөспүүбүлүкэтээҕи таһымнаах күрэхтэри ыытарга толору эппиэттиир, ону таһынан иккис этээскэ 286 квадратнай миэтэрэ иэннээх эти-сиини эрчийэргэ толору спортивнай инвентарынан хааччыллыбыт эрчиллэр саалалаах буолар.

Инники былааннары сырдат эрэ.

Чурапчы нэһилиэгэр элбэх саҥа сүүрээни 1951 сыллаахха спорт кэмитиэтин бэрэссэдээтэлинэн анаммыт, Чурапчыга бастакынан ДСО “Урожай”  уопсастыбатын тэрийбит Афанасий Кирикович Софронов буолар. Чурапчыга педагогическай училищеттан саҕалаан, тыа сиригэр бастакынан үрдүк физкултуура үөрэҕин кыһата — Институт аһыллыыта  биһиги улууспутугар спорт күүскэ сайдыытын кэрэһитэ, инникигэ эрэлэ буолар. Онон, педучилищеттан саҕалаан күн бүгүҥҥэ диэри Чурапчы нэһилиэгэ физкултуура уонна спорт сайдыытыгар улахан оруоллаах. Спорт маассабай көрүҥнэрэ сайдыбыттара, оҕо спортивнай оскуолата, филиаллара аһыллыбыттара. Чурапчы нэһилиэгин дьаһалтатын иһинэн үлэлиир спорт хайысхата Афанасий Софронов аатынан спорт комплекса тутуллан үлэҕэ киириитэ нэһилиэк олохтоохторун бары араҥата чөл олохтоох буолалларыгар, спордунан дьарыктаналларыгар, бастыҥ ситиһиилэри көрдөрөллөрүгэр олук буолара саарбахтаммат.

Кэпсэттэ Сэмэн Жендринскэй, Саҥа олох

Ааптар хаартыскаҕа түһэриитэ

Следите за самым важным и интересным в Telegram-канале и WhatsApp-группе ЯСИА