Сэтинньи 17 күнүгэр Дьокуускайга «Бэчээт дьиэтин» «Сахамедиа» пресс-киинигэр «Чолбон» уонна «Полярная звезда» сурунааллар Саха сирин духуобунай баайа диэн научнай-практическай конференция үлэлиир. Манна учуонайдар, литературоведтар уонна суруйааччылар тылларын-өстөрүн истээри элбэх киһи муһунна.
Үбүлүөйдээх «Чолбон», «Полярная звезда» сурунааллар Саха сирин историятыгар, культуратыгар суолталарын туһунан кэпсэтэр конференция арыллыытыгар «Сахабэчээт» автономнай тэрилтэ сүрүн дириэктэрэ Филипп Пестряков мустубут дьону эҕэрдэлээтэ. Дьон биһирэбилин ылар таһаарыылар билиҥҥи үлэлэрин туһунан сырдатта.
М.К. Аммосов аатынан ХИФУ суруналыыстыка кафедратын сэбиэдиссэйэ, «Саха сирин суруйааччылара» ассоциация бэрэссэдээтэлэ Олег Сидоров, Россия Суруйааччыларын сойууһун чилиэнэ, Былатыан Ойуунускай аатынан судаарыстыбаннай бириэмийэ лауреата Николай Винокуров-Урсун уонна Саха сирин суруйааччыларын сойууһун бэрэссэдээтэлэ, норуодунай бэйиэтэ Иван Мигалкин тыл эттилэр. Кинилэр саха литературатын кырдьаҕас сурунаалларын билиҥҥи туруктарын кытта билиһиннэрдилэр уонна билиҥҥи кэмҥэ саамай сөпкө саҥа сыһыарыы, литературнай салон тэрийэн үлэлэтэллэрин бэлиэтээн, инникитин да бу курдук айымньылаахтык үлэлииллэригэр эрэнэллэрин эттилэр.
Пленарнай чааһын Саха сирин суруйааччыларын Союһун бэрэссэдээтэлин уонна «Чолбон» сурунаал сүрүн эрэдээктэрин солбуйааччыта Гаврил Андросов салайан ыытта. Кини мустубут дьону эҕэрдэлээтэ уонна айымньылаахтык, таһаарыылаахтык үлэлииллэригэр ыҥырда.
ХИФУ гуманитарнай хайысхатын проректора, филологическай наука доктора Анатолий Бурцев «Сорок лет сотрудничества с «Поляркой», РНА СС ГЧуоХААНПИ литературоведение секторын сэбиэдиссэйэ, филологическай наука кандидата Лидия Романова «Чолбон» сурунаал кириитикэ уонна литератураны чинчийэр наука сайдыытыгар» тиэмэлэринэн саҕалаатылар.
Научнай-практическай конференция үлэтэ салҕанан барар. Барыта 33 дакылаатчык кыттара былааннанар.
