29 Тохсунньу 29.01
  • -48°
  • $ 73,82
  • 83,32

Бырабыыталыстыба отчуота: боротокуол туолуута куһаҕана суох

15:16, 29 февраля 2016
Текст:

СӨ Бырабыыталыстыбатын бэрэссэдээтэлин маҥнайгы солбуйааччыта Петр Алексеев салайааччылаах бөлөх Эбээн Бытантайга улууһун бары нэһилиэктэринэн сылдьан отчуоттаатылар. Хотоҥҥо сылдьан саха ынаҕын туругун билистилэр, тэрилтэлэргэ дьону кытта көрүстүлэр, эдэр баһылыктарга семинар ыыттылар. Кинилэри кытта Ил Түмэн депутата Елена Голомарева кэлсэн, Ил Түмэн үлэтин-хамнаһын сырдатта, быыбардааччыларын кытта көрүстэ.


Кустуурга субуруччу олус ардахтаах дьыллар тураннар, саха ынаҕын тутар «Бытантай» тэрилтэ балаһыанньата олус уустук этэ. Кэлин бырабыыталыстыба өттүттэн чопчу дьаһаллар ылыллыбыттара. «Урал», «Беларусь», мотокосилка курдук техникаларынан хааччыллыбыттара, икки сыл устата Тааттаттан көмө от бириэмэтигэр тиэллэн кэлбитэ. Билигин сүөһүлэр туруктара биллэрдик тубуста.

Чааһынай сүөһүлээх дьон ааспыт сайын ходуһалара курданалларыгар диэри ууга баран, отторо барыта сытыйан, тохсунньуга эрэ диэри тиийэр оту нэһиилэ тарбаан ылбыттара. Сүөһүлэрин көҕүрэтэр санаалаах олордохторуна, бырабыыталыстыба көмө от тиэйэрин истэн, онно эрэнэн хаалларбыттара. «Бириэмэтигэр от тиэллэн кэлбитин атыылаһан салҕанныбыт. Таатталарга, уустук суолу аахсыбакка от тиэйэн аҕалбыт суоппардарга, бырабыыталыстыбаҕа махтанабыт. Өбүгэлэрбит илдьэ кэлбит саха ынахтарын харыстаан иитиэхпит», — диэн олохтоохтор санааларын эттилэр.

«Бу сүөһү төрөөбүт-үөскээбит түөлбэтигэр эрэ элбиир, сайдар, атын боруоданы кытта булкуспат туруктаах. Онон атын улуустарга тарҕатары утарабыт уонна саха ынаҕын инники сайдыытын быспат инниттэн туһунан ыстатыйанан саҥа тыа хаһаайыстыбатын сокуонугар киллэрэн туран, манна саҥа хотон туттаран, базатын тупсаран, ыанньыксыттар хамнастарын эбэн ураты тулуйумтуо , олохтоох боруода быһыытынан сыаналаан көмө барара буоллар дьон да турунуо этилэр», — диэн бырабыыталыстыбаҕа этиннилэр.

Кустуурдар саҥа хочуолунай, таба хараалын тутууну, интернет туругун тупсарыыны, Саккырыыр – Кустуур суолун тутуутун салҕыыр наадатын этиннилэр. Маны таһынан мустубут дьон бары нэһилиэктэргэ оҕо уһуйааннара олус эргэрбитттэрин, киин хочуолунайдары тутууну, Саккырыырга оскуола тутуллуутун түргэтэтэри, «Якутопторг» нөҥүө кэлэр ас ассортименыгар оҕо аһа эбиллэрин, хоту улуустарга үлэлиир учууталларга коммунальнай өҥөҕө көрүллэр харчы улаатара наадатын, балыыһаҕа эминэн-томунан хааччыллыы мөлтөҕүн, аутсорсинг киириитэ бу кириисис тыҥаан турар кэмигэр дьоҥҥо-сэргэҕэ олус улахан охсуулааҕын уонна хоту улуустарга киирэрэ олох табыгаһа суоҕун этиннилэр.

Бөлөх салайааччыта Петр Алексеев: «Эһиэхэ былырыын кэлэ сылдьан туруорсубут боппуруостаргытын ырытан көрдөххө, боротокуол туолуута куһаҕана суох. Балыыһаҕытыгар үп көрүллэн өрөмүөннэммит, саҥа балыыһа тутуута 2018 сылга былааннанар. «Земский доктор» бырагырааманан хоту улуустарга 10 быраас үлэлии сылдьар, ол иһигэр эһиэхэ эмиэ. Саха ынаҕын тэрилтэтин быйылгы туруга тупсубут. Сүөһүгүт, табаҕыт, сылгыгыт ахсаана эбиллибит, өрөспүүбүлүкэҕэ көҕүрээһин бара турар. От тиэллэн кэлбит, саҥа техника баар», — диэн отчуоту түмүктээтэ.

0
0
29 января 29.01
  • -48°
  • $ 73,82
  • 83,32