2016 сыл тохсунньу ыйтан ыам ыйыгар диэри хас сыл аайы “Наследники Победы – победителям” диэн өрөспүүбүлүкэтээҕи акция ыытыллыбыта. Тэрээһиҥҥэ булуҥнар эмиэ кыттыбыттара.
Оскуола оҕолорун уонна эдэр дьону патриотическай иитиигэ сыалламмыт көҕүлээһин Булуҥ улууһугар киэҥник тарҕаммыта. “Юность Арктики” (Арктикатааҕы гимназия), “Единство” (Быыкап оскуолата), “Школьная Дума” (Күһүүр оскуолата), «Үҥкээбил” (Таймылыыр оскуолата), “Намыы кэскилэ” (Бороҕон оскуолата), “Осикат” (Хара-Уулаах оскуолата) бары Кыайыыны уһансыбыт буойуттар сырдык кэриэстэригэр анаммыт дьаһалга өйдүүн-санаалыын ылсыбыттара.
«Куонкурус түмүгүнэн кыайыылаахтарга уонна призердарга “Град Петров” уонна “Москва – Золотое кольцо России” маршрутунан туристическэй сертификаттары туппуттара. Биһиги улууспутуттан 10 үөрэнээччи бу путевканы тутта – Бороҕоннооҕу орто оскуолаттан уонна Арктикатааҕы гимназияттан 8 уонна 10 кылаас үөрэнээччилэрэ. Билигин оҕолор санаалара өрө көтөҕүллэн сылдьар, айаны наһаа кэтэһэ сылдьаллар. Оҕолор бэйэлэрин дойдуларын историятын көрүөхтэрэ уонна төрөөбүт дойдуларынан киэҥ тутталларын өйдүөхтэрэ«, — диэн СИА-ҕа оскуола таһынааҕы үлэ киинин методиһа, «Кэскил» оҕо хамсааһынын оройуоннааҕы бэрэссэдээтэлэ Мария Капитонова кэпсээтэ.
