Боотулууга саҥа оскуола тутуллар. Көҥдөйүн таһаарыыга аҕыйах хонуктааҕыта аукцион буолан ааста. Онно Дмитрий Петров салайар «Сахаспецмонтаж-95» ХЭТ соҕотоҕун кытынна.Үлэ суумата — 63 мөл.солк.
Бу нэдиэлэҕэ Боотулуу оскуолатын көҥдөйүн тутуутугар контракка оскуоланы сакаастаан туттарааччы «ПТуоИСС» муниципальнай казеннай тэрилтэ (МКУ «Управление промышленности, строительства и развития инфраструктуры Верхневилюйского улуса», нач. Дмитриев Н.Н.) уонна бэдэрээччит «Сахаспецмонтаж-95» ХЭТ (директор Петров Д.А.) илии баттыахтаахтар. Быйылгыга көрүллүбүт үпкэ икки этээстээх оскуола дьиэтин көҥдөйө дьэндэйэн тахсыахтаах.
Быйыл ыытыллыахтаах үлэҕэ сөп буолар тутуу матырыйаала үксэ кэлэн сытар. Ол курдук, 1500 т. щебёнканы, 400 т. сиэмэни, 1000 куб.м. кумаҕы, 350 куб.м. ПГС, 25 куб.м. хаптаһыны, 70 т. арматура тимирин эрдэ тиэйэн аҕаллылар. Бүгүн-сарсын опалубка маһа тиэллэн кэлиэхтээх.
«Онон, сотору кэминэн Боотулуу саҥа оскуолатын тутуута саҕаланыахтаах. Олохтоохторго үлэ миэстэтэ таһаарыллара чуолкай. Үөрэхпит кыһата хаачыстыбалаахтык уонна тэтимнээхтик тутуллан иһэригэр баҕарабыт», — диэн нэһилиэк баһылыга Александр Семенович Поскачин иһитиннэрдэ.
Үөрэх управлениетын начаалынньыга Спиридон Борбуев иһитиннэрбитинэн, быйыл оскуола тутуутун таһынан, Боотулуу дьыссаатыгар улахан өрөмүөн үлэтэ ыытыллыахтаах. Сотору кэминэн аукцион ыытыллыа.
