Быйыл бэс ыйын 1 күнүттэн үлэлээбэт биэнсийэлээхтэр биэнсийэлэрин кээмэйэ 10% үрдүөҕэ, ону тэҥэ айах ииттэн олоруу алын кээмэйэ 10% үрдүөҕэ. Айсен Николаев ыам ыйын 30 күнүгэр планернай мунньахха региоҥҥа федеральнай өйөбүлү олоххо киллэриини хонтуруоллуурга уонна халаан уутуттан хоромньуну ааҕыыны түргэтэтэргэ сорудахтаата, диэн Саха сирин баһылыгын уонна бырабыыталыстыбатын пресс-сулууспата иһитиннэрэр.
РФ бэрэсэдьиэнэ Владимир Путин сорудаҕынан дойдуга айах ииттинии алын кээмэйэ 10% үрдүүр, ону тэҥэ үлэлээбэт биэнсийэлээхтэр биэнсийэлэрэ 10% үрдүөҕэ. От ыйын 1 күнүттэн 10%- нан үлэ төлөбүрүн алын кээмэйэ улаатыаҕа. Саха сирин былаастара өрөспүүбүлүкэҕэ индексация этиллибит болдьоҕор ааһарын туһугар регионнааҕы таһымҥа туһааннаах докумуоннары ылыахтара.
Итиэннэ, Айсен Николаев халаан уутуттан хоромньуну ааҕыыны түргэтэтэргэ, олохтоохторго тустаах көмөнү оҥоро охсорго сорудахтаата. Билигин хоромньуну сыаналааһыҥҥа муниципальнай хамыыһыйалар үлэлэрэ бара турар.
Мунньахха регион баһылыга региоҥҥа федеральнай өйөбүлү олоххо киллэриини хонтуруолга тутар наадатын ыйда. Ол курдук, бу күннэргэ коммунальнай инфраструктураҕа национальнай уйгу пуондатыттан үбү ыларга сайаапканы өйөөтүлэр. Өрөспүүбүлүкэ сылааһынан хааччыйыы хаачыстыбатын үрдэтэргэ 1,4 млрд солкуобайы ылыаҕа.
Дьону хаарбах дьиэлэртэн көһөрүүгэ ОДьКХ пуондатыттан 25,7 млрд солк биэриэхтэрэ. 2023 сылга диэри 4 020 аварийнай олорор дьиэттэн 9 тыһыынчаттан тахса киһи көһөрүллэрэ былааннанар.
2022-2023 сылларга Саха сирэ спортивнай объектары тутууга эбии 152 мөл. солк. ылыаҕа. Үбү «Бизнес- спринт» саҥа федеральнай бырайыак чэрчитинэн модульнай спортивнай саалалары уонна «өйдөөх» спортивнай площадкаларын оҥорууга аныахтара.
