Тыа хаһаайыстыбатын министиэристибэтигэр Бэс Күөлүгэр баһаартан эмсэҕэлээбит дьоҥҥо хоромньуларын толуйарга үлэ саҕаланна. Баһаарга эмсэҕэлээбит 13 ыалтан сэттэтэ – фермердэр, алтата – кэтэх ыал. Кинилэр истэригэр саамай улахан хаһаайыстыбалаах — 335 төбө сүөһүлээх Алексей Петров баар. Бу туһунан https://www.instagram.com/p/CSYx2zGs95s/ суруйар.
Бу күннэргэ хоромньу ааҕыллан түмүктэннэ. Ол түмүгүнэн, 13 тыа хаһаайыстыбатынан дьарыктанар ыалга:
— 9 сүөһү, ол иһиттэн 8 быйылгы төрүөх ньирэй уонна биир тыһаҕас;
— 8 сибинньэ;
— 19 куурусса;
— 10 хотон;
— 1 сибинньэ уйата;
— 3 техника (МТЗ-82, синтай, уу баһар массыына) уокка былдьаммыт.
Тыа хаһаайыстыбатын миниистирин бастакы солбуйааччы Татьяна Осипова хоромньуну, үбү-харчыны ааҕыыга үлэни ыытар. Онтон миниистир солбуйааччыта Николай Афанасьев Бэс Күөлүгэр миэстэтигэр үлэлиир.
Ил Дархан Айсен Николаев сорудаҕынан, бу нэдиэлэ устата хоромньу ааҕыллан, чопчуланан бүтэн, дьоҥҥо көрсүбүт сүтүктэрин толуйарга үлэ барыахтаах.
Баһаарга эмсэҕэлээбит 13 ыалтан сэттэтэ – фермердэр, алтата – кэтэх ыал.
2012 сыллаахха «Дьиэ кэргэнинэн ынах сүөһүнү иитии» диэн конкурска кыттан грант ылбыт Алексей Петров Атамай нэһилиэгин биир улахан фермера буолар. Бу дьыл атырдьах ыйын 1 күнүнээҕи туругунан 335 сүөһүлээх, ол иһиттэн ыанар ынаҕа 132 төбө. Алексей Алексеевич 100 миэстэлээх хотоно уокка былдьанна. Тыа хаһаайыстыбатын министиэристибэтэ, хотону 100% чөлүгэр түһэрэргэ үлэни саҕалаата уонна ороскуотун 100% уйунар.
Кыстыкка киирэр кэм чугаһаабытынан, биир улахан хотону тутан быйыл сүөһүлэри барыларын бииргэ кыстатын диэн этии киирбитин, олохтоохтор сөбүлэспэтилэр. Министиэристибэ да өттүттэн кинилэр этиилэрин өйүүллэр. Дьон биллэн туран, хотоно дьиэтин аттыгар чугас буолуон баҕарар. Онон хотонноро уокка былдьаммыт дьоҥҥо саҥа хотон тутталларыгар көмө оҥоһуллуоҕа. Маны сэргэ, сүөһү, сибинньэ, куурусса уонна тиэхиникэ ороскуотун эмиэ толуйуохтара.
От боппуруоһугар үлэ ыытыллар. Кыстыыр отторун министиэристибэ атыылаһан, тиэйэн аҕаларга үлэни саҕалаата.
Тыа хаһаайыстыбатын министиэристибэтэ эмсэҕэлээбит дьон кыстык иннинэ оннуларын булалларын туһугар үлэни ыытар.
