Саха сиригэр бастакы термическай туочукалары бигэргэтиллэн сурулуннулар. Регион баһылыга ЧС өрөспүүбүлүкэтээҕи хамыыһыйатын мунньаҕын кэмигэр умайыыларга суһаллык эппиэттииргэ сорудахтаата.
«Хайыы-үйэ бастакы термоточкалар бигэргэтилиннилэр. Экология министиэристибэтигэр, ЫБММ-ҕэ уонна оройуоннар баһылыктарыгар хас биирдии умайыыга суһаллык эппиэттииргэ, буруйдаахтары олохтуурга уонна сокуонунан көрүллүбүт дьаһаллары ыларга сорудахтаатым. Термоточкалар ахсааннара уонна уот сиэбит иэннэрэ эмискэ үрдээтэхтэринэ эбии быһаарыылар ылыллыахтара«, — диэн МАХ-ханаалыгар Айсен Николаев суруйда.
Айсен Николаев бары салайааччылар муҥутуур хомуллан, урутаан үлэлииллэрин ирдээтэ. Халаан уута уонна баһаартан кутталлаах быһыы-майгы куруук хонтуруолга сылдьыахтааҕа этилиннэ.
«Саха сирин дьонун, нэһилиэнньэлээх пууннарын, экономикатын уонна айылҕа эбийиэктэрин куттала суох буолуута — тутаах приоритет», — диэн өрөспүүбүлүкэ баһылыга тоһоҕолоон бэлиэтээтэ.
Эрдэ Саха сиригэр ыам ыйын 5 күнүгэр халаан уута кутталыттан үрдүк бэлэмнэнии эрэһиимэ киллэриллибитин иһитиннэрбиппит.
