Баһаары утары үлэҕэ штаты таһынан бөлөхтөргө регион үрдүнэн 285 киһи хомуллан, тэрилиннэ. Ол туһунан «Госкомобеспечение» тэрилтэ бэрэссэдээтэлэ Дмитрий Лепчиков туһааннаах штаб мунньаҕар эттэ.
Быйыл Саха сиригэр тыһыынчаттан тахса килэмиэтир минерализованнай балаһа уурар уонна саҥардар, итиэннэ 660 км баһаары утары хайдыылары оҥорор былааннаахтар. Бу сыалга олохтоох бюджекка 106 мөл солк көрүлүннэ, диэтэ Лепчиков.
2023 сылга Саха сирин Быыһыыр сулууспатын аэромобильнай бөлөҕүн ахсаана эбиллиэҕэ. Бөлөх ааспыт сылга Ил Дархан Айсен Николаев сорудаҕынан тэриллибитэ. 2022 сыллаахха 41 киһилээҕэ, билигин сотрудниктар ахсааннара 71 буолар.
Санаттахха, Уус Майа уонна Саха сирин киин өттүгэр ыам ыйын 12 күнүттэн баһаары утары сезон саҕаланар. Туһааннаах боппуруоска буруйу оҥорооччулары ыстырааптыахтара.
