Арассыыйа Бэрэсидьиэнэ Владимир Путин сорудаҕынан уонча сыллааҕыта дойдуга тыа сирин олоҕун таһымын үрдэтэргэ, саҥа тутуулары ыытарга туһуламмыт «Тыа сирин кэлимник сайыннарыы» бырагыраама үлэтин саҕалаабыта.
Бырагырааманан тыа сиригэр социальнай эбийиэктэри тутууттан саҕалаан суоллары аспаалынан бүрүйүү, олорор дьиэлэри тутуу кытта көрүллэр. Бүлүү улууһугар «Тыа сирин кэлимник сайыннарыы» бырагырааманан улуус кииниттэн өрүс уҥуор тэйичччи сытар Үгүлээккэ икки мэндиэмиэннээх таас дьиэлээх оҕо уһуйаана, I Күүлэккэ эмиэ таас дьиэлээх оскуола тутуллубуттара.
Үгүлээккэ оҕо уһуйаана саҥа дьиэҕэ үлэлии турар буоллаҕына, I Күүлэт оскуолатын дьиэтэ бэлэм, кулун тутар ыйга лисиэнсийэ ылыахтаах.
Ити туһунан сэрии бэтэрээнин, үтүөлээх учуутал Прокопий Алексеевич Павлов аатын сүгэр оскуола дириэктэрэ Сардана Томская бу курдук кэпсээтэ:
— Биһиги нэһилиэккэ оскуола аан бастаан 1935 сыллаахха тэриллибитэ. Онтон 1956 сыллаахха Уһун бөһүөлэгэр былыргы уустар туппут сырдык, киэҥ-куоҥ оскуолалара көһөрүллэн аҕалыллыбыта. Оҕолор ол оскуолаҕа 75 сыл тухары үөрэнэн кэллилэр.
Биһиэхэ саҥа оскуола тутуллан киирэн эрэбит. Саҥа оскуола тутуллуоҕуттан биһиги нэһилиэккэ дьон үөрүүтэ улахан. Ааспыт сыл ахсынньы 8 күнүгэр оскуоланы арыйыы тэриллибитэ. Лисиэнсийэ ыллыбыт да, оскуолаҕа киирэрдии бэлэм сылдьабыт.
Оскуола аныгы ирдэбилинэн оборудованиета кэлэн турар, паарталарын, остуолларын туруорбуттара. Инньэ гынан, оскуолаҕа киирэн үөрэнэрбит эрэ хаалла.
Биһиги оскуолабытыгар 117 оҕо үөрэнэр, 50 үлэһиттээхпит. Оҕолорбут киэҥ-куоҥ оскуолаҕа үөрэнэрдии үөрэ-көтө сылдьаллар, учууталлар бары кабинеттаах буолаллар.
Билигин Роспотребнадзор ирдэбилинэн аҕыйах кабинекка софиттар туруохтаахтар, куукуна оборудованиета турбута эрээри, кинилэр этиилэрин толоруохтаахпыт. Кыра уларытыылар киириэхтэрин наада.
* * *
Ити курдук, сотору кэминэн улууска биир кыраһыабай дьиэлээх, араас оборудованиенан толору хааччыллыылаах оскуолаҕа оҕолор саҥалара чугдаарыа.
Николай Куприянов, «Олох суола» хаһыат, Бүлүү улууһа
