Кырдьаҕас Бүлүү куоракка бэс ыйын 30 күнүгэр Хомустаах комплекснай этнографическай киинигэр улуус бэтэрээннэрин өрөгөйдөөх Уруҥ Тунах Ыһыаҕа буолан ааста.
Улуус бэтэрээннэрин Сэбиэтэ 2016 сылы тыыл бэтэрээннэрин сылынан биллэрбитэ.
Онон бу күн аҕа көлүөнэ дьон атах тэпсэн олорон, инникини торумнаатылар, эдэрдэргэ алгыстарын анаатылар.
Түһүлгэ саамай ытык, саамай күндү ыалдьыттарынан аҕа дойдуну көмүскүүр улуу сэрии кыттыылаахтара буоллулар. Ол курдук, Афанасий Иннокетьевич Николаев — Саха Республикатын норуотун хаһаайыстыбатын үтүөлээх үлэһитэ, Бүлүү улууһун бочуоттаах гражданина, Николаев Николай Сидорович — Бүлүү улууһун бочуоттаах гражданина, Яковлев Прокопий Иванович — Бүлүү улууһун бочуоттах гражданина кэлэннэр үөрүүнү үксэттилэр.
Үрүҥ Тунах ыһыах үөрүүлээх аһыллыытыгар алгысчыт Владимир Николаев-Тоорукча алта кыталык кыыс арыалдьыттаах киирэн аал уоту оттон, алгыс сиэрин-туомун толордо.
Улуус баһылыгын социальнай политикаҕа солбуйааччы В.Ф.Тихонова мустубут дьону, ытык-мааны бэтэрээннэри бастакы Бүлүү улууһун бэтэрээннэрин ыһыаҕынан истиҥник эҕэрдэлээтэ. «Быйылгы ыһыах бастакы буоларын быһыытынан, сылтан-сыл аайы кэҥээн, киэркэйэн, хаҥаан, суон сураҕа сураҕыран, аҕыйах сылынан бэлиэтиэхтээх Кыайыы 75 сылын көрсөрбүтүгэр, Кыайыы үбүлүөйдээх ыһыаҕын ыһарбытыгар бэлэмнэнии буолар. Бу ыһыаҕы ыытарга сүрүннээн Бүлүү улууһун бэтэрээннэрин Сүбэтэ, салайааччы Г.А. Солтуев үлэлээтилэр. Олус наадалаах дьыаланы саҕалаабыккытыгар махтанабын», — диэтэ баһылык солбуйааччыта.
Улуустааҕы бэтэрээн Сэбиэтэ быйыл олунньу ый 16 күнүгэр, уочараттаах президиум мунньаҕар сүбэлэһэн, уураахтаан «Бүлүү улууһун бочуоттаах бэтэрээнэ» диэн анал Бэлиэни оҥотторорбута. Маннык Бэлиэнэн улуус 39 көхтөөх бэтэрээнэ наҕараадаланна. Бастакы нүөмэрдээҕи Ытык бэтэрээннэр Николаев Афанасий Иннокентьевич, Николаев Николай Сидорович, Яковлев Прокопий Иванович туттулар.
Көр-оонньуу, оһуохай хойукка диэри дьиэрэйдэ.
