В.Г.Румянцев аатынан Бүлүүтээҕи оҕо спортивнай оскуолатын көҥүл тустууга ыстаарсай тириэньэрэ Артем Харлампьев салалтатынан Бүлүү эдэр тустууктара аны сайын от ыйыгар Дьокуускай куоракка ыытыллар «Азия оҕолоро» VIII норуоттар икки ардыларынааҕы күрэхтэһиигэ кыттарга бэлэмнэнэллэр.
«Азия оҕолоро» спортивнай күрэхтэһии көбүөрүгэр Бүлүү эдэр тустууктарыттан ким тахсыан сөбүн туһунан ыстаарсай тириэньэр Артем Харлампьев бу курдук билиһиннэрдэ:
— «Азия оҕолоро» аан дойдутааҕы спортивнай оонньууларга кыттыахтарын сөп диэн билиҥҥитэ 35-38 кг ыйааһыҥҥа тустар Мирон Протопопов, 44 кг — Руслан Сергин уонна 68 кг ыйааһыннаахтарга тустар Пантелеймон Софронеев резервэҕэ сылдьаллар.
Кинилэр сайын сүүмэрдиир бэлэмнэниигэ эрчиллибиттэрэ, Кыргызстаҥҥа уонна Казахстаҥҥа тиийэн улахан турнирдарга кыттыбыттара. Биир ый кэриҥэ эрчиллэр сбордарга сылдьыбыттарын бэлиэтиэххэ сөп.
Казахстаҥҥа Абайскай уобалас Жарминскай куоратыгар тэриллибит турнирга Мирон Протопопов 3 призер буолбута, Пантелеймон Софронеев чемпион үрдүк аатын ылбыта. Кыргызстаҥҥа Талас куоракка ыытыллыбыт турнирга Мирон Протопопов эмиэ үһүс миэстэҕэ тахсыбыта, Пантелеймон Софронеев чемпион буолбута.
Саха сирин үөрэнээччилэрин спартакиадатыгар уолаттар бастаабыттара, тустуу фестивалыгар — «Боотурдар оонньууларыгар» Мирон Протопопов чемпион буолбута уонна кыраһыабай тустууну көрдөрбүтүн иһин «Күрэхтэһии бастыҥ тустууга» аат иҥэриллибитэ.
Уһук Илин уокурукка көҥүл тустууга бастыырга биһигиттэн Миша Семенов үһүс призер буолбута эмиэ ситиһии буолар.
Кыргызстаҥҥа уонна Казахстаҥҥа барарбытыгар Георгий Осипов дириэктэрдээх Бүлүүтээҕи оҕо спортивнай оскуолата улахан көмөтүн, Ян Попов баһылыктаах куорат дьаһалтата биир оҕо барарын-кэлэрин төлөспүтүн, «Байдам» атыы-эргиэн киин салайааччыта, куорат Сэбиэтин депутата Тимур Буслаев, Халбаакы нэһилиэгин баһылыга Алексей Васильев үбүнэн көмөлөспүттэрин бэлиэтиэххэ сөп. Оҕо спорда сайдарыгар күүс-көмө буолбут дьоммутугар улахан махталбытын тиэрдэбит!
Ити курдук, Бүлүү эдэр тустууктара «Азия оҕолоро» VIII норуоттар икки ардыларынааҕы күрэхтэһии Саха сирин көҥүл тустууга сүүмэрдэммит хамаандатыгар киирэргэ резервэҕэ сылдьаллар, улахан турнирга кыттарга күүстээх эрчиллиини ааһаллар.
Николай Куприянов, Олох суола
