21 От ыйа 21.07
  • 29°
  • $ 88,02
  • 96,04

Бүлүү биэс предпринимателэ олохтоох граны тутуоҕа

Читайте нас на
Яндекс Новости
ЯДВ

Бүлүү улууһун предпринимателлэрэ түмүстүлэр. Үп управлениетын начальнигын солбуйааччы, тэрийээччилэртэн биирдэстэрэ Анисим Алексеев анал декада чэрчитинэн кэккэ дьаһаллар ылыллыбыттарын кэпсээтэ. Ордук үтүө санааланыы акцията бизнеһинэн дьарыктанааччылары сомоҕолоото. Граннар олохтоннулар.


Бүлүү улууһугар алтынньы 9-19 күннэригэр улуус баһылыгын анал дьаһалынан предпринимателлэр декадалара биллэрилиннэ.

Биир сүрүн дьаһалынан социальнай суолталаах «Добрые сердца» диэн акция буолла. Онно предпринимателлэр кыттыһан, улуус кырдьаҕастарыгар 40-ча киһиэхэ бэйэлэрин бэлэхтэрин туттардылар.

В.О.Каратаев аатынан Олоҥхо дьиэтигэр Бүлүү улууһун предпринимателлэрин быыстапка-дьаарбаҥкалара буолла. Эҕэрдэ тылы улуус баһылыгын бастакы солбуйааччы Иван Иванович Евсеев эттэ. Онно «Доктор+» ХЭУо нэһилиэнньэҕэ босхо көрүүнү ыытта, ЭКГ түһэриини, анаалыстары ылыыны тэрийдэ. Малявская Е.К. кондитерскай бурдук аһын атыыга туруорда. Тыа сирин предпринимателлэрэ Лөкөчөөнтөн ИП Харлампьев А.К., Дьөккөнтөн ИП Ионов И.И., Бөтүҥтэн ИП Петрова Р.Н. астарын-үөллэрин дэлэйдик тартылар. ИП Попова Л.К. сууламмыт пельменин, халадьыаһын ылааччы элбэ буолла. Бэйэбитигэр үүнэр оттортон оҥоһуллубут чэй арааһын ИП Афанасьев А.С. атыыга таһаарда.

Быыстапка-дьаарбаҥкаҕа нэһилиэнньэҕэ өҥөнү оҥоруу көрүҥэ эмиэ учуоттанна. Ол курдук ИП Руфова А.А. күлүүс оҥоруутун, ИП Иванова А.А. парикмахер-визажист өҥөтүн оҥордулар. «КадастрСтройПроект» ХЭУо дьиэлэр, гаражтар бырайыактарын көрдөрдө. ИП Иванов В.Е. көмүс оҥоһуктары көрдөрүүгэ туруорда.

Үөрэнээччилэр бизнес-түмсүүлэрэ – «Кэскил» оҕо киинэ, Бөкчөҥөө, Бороҕон оскуолалара, ЦНТТУ сувенирдары, оҕуруот астарын быыстапкатын аҕалбыттар.

Предпринимателлэр декадалара куонкурус-семинарынан түмүктэнэр. Дьокуускайтан бу семинары ыытарга анаан-минээн ыҥырыллан кэллилэр: «Фокус-Про» консалтинговай киини тэрийбит Дьулус Иванов уонна нолуогу төлөөччүлэр бырааптарын көмүскүүр Агентствоттан Александра Окорокова.

Кыра уонна орто бизнеһинэн дьарыктанар предпринимателлэргэ улуустан 2,5 мөл. солк. суумалаах Грант олохтонно. Онно куонкурус-семинар түмүгүнэн бастыҥ бырайыактаах 5 предприниматель тиксиэҕэ.

Ааптар Николай Федоров, «Олох суола» хаһыат, Бүлүү улууһа.

Следите за самым важным и интересным в Telegram-канале и WhatsApp-группе ЯСИА