Бүгүн Саха сиригэр Бүлүү өрүс күнүн бэлиэтииллэр. Үөһээ Бүлүү, Бүлүү, Ньурба, Сунтаар олохтоохторо тапталлаах эбэлэригэр анаммыт хаартысканан, видеонан дьүһүйүүлэри таһаараллар.
Үөһээ Бүлүү Хоротун олохтооҕо Розалия Самсонова: «Иитиллэн олорор Бүлүү эбэбит уутун, айылҕатын, тулалыыр эйгэтин харыстыаҕыҥ!» диэн ыҥырыы оҥордо.
Ыам ыйын 25 күнүгэр Саха сиригэр Бүлүү өрүс күнэ бэлиэтэнэр. Бүлүү — Өлүөнэ өрүс саамай уһун уонна бөдөҥ салаата. Өрүс уһуна 2650 км, бассейнын иэнэ — 454 000 км².
Бырааһынньык Бүлүү ураты айылҕатын харыстааһыҥҥа уонна экотуризмы сайыннарыыга болҕомтону тардар сыаллаах тэриллибитэ. Бүлүү өрүс күнэ аан бастаан 2014 сыл балаҕан ыйын 26 күнүгэр экологическай бэстибээл быһыытынан ыытыллыбыта, оттон 2017 сылтан сыл ахсын ыам ыйын 25 күнүгэр бэлиэтэнэр.
Бу күн Бүлүү бөлөх улуустарыгар экологическай аахсыйалар, өрүс кытылларын ыраастыыр субуотунньуктар, айылҕа баайын харыстааһыҥҥа анаан культурнай уонна үөрэх тэрээһиннэрэ ыытыллаллар.
