Арктикатааҕы эргиэн-логистика хампаанньата (АТЛК) өрөспүүбүлүкэ Арктикатын оройуоннарыгар эргиэн-логистика кииннэрин ситимин нөҥүө нэһилиэнньэттэн айылҕа отонун ылыыны иккистээн тэрийдэ. Быйыл хампаанньа 10 туоннаҕа тиийэ отону ыларга бэлэм, диэн «АТЛК» АК генеральнай дириэктэрэ Сайдам Степанов ЯСИА иһитиннэрдэ.
Кини этэринэн, бырайыак өссө былырыын саҕаламмыта. Оччолорго олохтоохтор хомуйбут отоннорун икки ньыманан туттарбыттара: харчынан төлөбүргэ эбэтэр бартер систиэмэтинэн — ас-үөл уонна туттар табаарга атастаһан.
2025 сыллаахха бырагыраамаҕа икки эрэ Арктика оройуона кыттыбыта. Эдьигээн олохтоохторо сугуну, дьааҥылар – уулаах отону. Барыта хас да туонна отон хомуллубута. Быйыл хампаанньа айылҕа отонун ылыыны иккистээн биллэрдэ уонна көҕүлээһиҥҥэ элбэх оройуон кыттарыгар суоттанар.
«Биһиги 10 туоннаҕа тиийэ ылыахпытын сөп. Ол эрээри кээмэйи былааннааһын уустук, тоҕо диэтэххэ, барыта нэһилиэнньэ көҕүлээһиниттэн тутулуктаах. Отону биһиги хомуйбаппыт, тутабыт эрэ», — диэн эттэ тустаах салайааччы.
Тэрилтэ көрдөрөрүнэн, быйыл отон сүрүн көрүҥнэригэр атыылаһар сыана маннык олохтоммут: сибиэһэй морошка — 1600-1700 солк/кг, сугуна — 600-700 солк/кг, уулаах отон — 300-350 солк/кг, уохта — 650-750 солк/кг. Отону тута АТЛК оҥорон таһаарар сыаҕар ыытыллар. Күһүҥҥү-кыһыҥҥы сезоҥҥа айылҕа отонуттан «АрктикВкус» брендынан атыыга бэлэм бородууксуйаны таһаараллар.
ТЛЦ ситимин сайыннарыы — Саха сирин Арктикатын зонатын сайыннарыы улахан тосхолун сорҕото. Бырайыак өрөспүүбүлүкэ баһылыга Айсен Николаев «Об основных направлениях государственной политики Республики Саха (Якутия) в Арктической зоне Якутии на период до 2030 года» ыйааҕынан олоххо киирэр. Кини сорудаҕынан ТЛЦ ситимэ регион Арктикатын бары 13 улууһугар тэриллибитэ.
