2026 сыл атырдьах ыйын 1 күнүттэн Арассыыйа олохтоохторо «Госуслуги» порталга тус кабинеттарыгар сайабылыанньата суох нолуок туһунан иһитиннэриилэри ылыахтара, диэтэ Госдуума дьокутаата, кыра уонна орто урбаан кэмитиэтин баһылыга Александр Демин ТАСС-ка.
Билигин маннык иһитиннэриини ыларга анал сайабылыанньаны биэрии ирдэнэр. Атырдьах ыйыттан оннук наадата суох буолар — докумуоннар бигэргэммит учуоттуур суруктаах быһа ыытыллыахтара. Порталы туһаммат дьоҥҥо үгэс буолбут ньыма хаалар – сакаас суруга.
Демин этэринэн, саҥа уларыйыы ордук урбаанньыттарга тоҕоостоох, кинилэр бас билиилээх нолуогу уонна НДФЛ-ы (дохуот нолуогун) физическэй сирэй быһыытынан төлүүллэр. Бу түгэҥҥэ нолуок төлөөччү хойутаан иһитиннэриини ылбыт балаһыанньатыттан куотууга көмөлөһөр. Электроннай иһитиннэриигэ бары наадалаах даннайдар ыйыллаллар: ИНН, хас биирдии нолуок суумата, болдьохтор, УИН уонна ЕНС сальдо.
Дьокутаат 2025 сыллааҕы бас билиилээх нолуогу уонна НДФЛ-у төлүүр болдьох 2026 сыл ахсынньы 1 күнүттэн хойутаабат диэн санатта, онон саҥа бэрээдэги баһылыырга бириэмэ сөп буолар. Маны таһынан кини тоһоҕолоон бэлиэтээтэ: иһитиннэрии тус кабинекка тахсыбыт күнүттэн ылыллыбытынан ааҕыллар, аахпат буолуу нолуогу төлөөһүнтэн босхолообот уонна пеня ааҕылларын тохтоппот.
