Саха сирин бастакы Арктика сэлиэнньэлэрэ «Синергия Арктики» бырайыак көмөтүнэн быйыл үрдүк тэтимнээх интэриниэккэ холбонуохтара. Бу туһунан өрөспүүбүлүкэ баһылыга Айсен Николаев «Якутия, вперед!» биэриигэ «Якутия 24» телеханаалга иһитиннэрдэ.
«Быйыл биһиги Арктикабыт оройуоннарыгар хас даҕаны нэһилиэнньэлээх пуун оптоволоконнай сибээс лииньийэтигэр холбонор кыахтаналлар. Саҥа дьылга диэри олус өр күүппүт түргэн интэриниэппит Арктика оройуоннарын нэһилиэнньэлээх пууннарыгар баар буолуо диэн улаханнык эрэнэбин», — диэтэ Айсен Николаев.
Регион баһылыга бэлиэтээн эппитинэн, «Синергия Арктики» бырайыагынан «АрктикТелеком» хампаанньа Магадан уобалаһыттан саҕалаан, Халыма, Дьааҥы уонна Индигиир өрүстэр усталарынан соҕурууттан хоту диэки 7 тыһыынча килэмиэтир оптоволокнону тардыахтаах.
Айсен Николаев бырайыак Арассыыйа Федерациятын бэрэсидьиэнэ Владимир Путин быһаарыыларынан, РФ бырабыыталыстыбатын уонна «Биир ньыгыл Арассыыйа» баартыйа өйөбүллэринэн олоххо киирэрин тоһоҕолоото.
2028 сыл бүтүөр диэри Саха сирин 61 нэһилиэнньэлээх пуунугар, онно олорор 50-тан тахса тыһыынча киһиэхэ, волокно-оптика сибээс лииньийэтэ тиэрдиллиэхтээх.
