Арассыыйа Үөрэҕириигэ министиэристибэтэ үрдүкү кылаастарга үөрэх бырагырааматыгар уларытыылары киллэрэр былааннааҕын туһунан РИА Новости ааҕыныстыба миниистир Сергей Кравцовка сигэнэн иһитиннэрэр. Саҥа үөрэх стандарта 2027 сыл балаҕан ыйын 1 күнүттэн күүһүгэр киириэҕэ.
Миниистир этэринэн, үөрэх ис хоһоонун быраактыкаҕа туһаайан, аныгы олоххо сөп түбэһиннэрэн оҥоруохтара. Оскуола оҕолоро урукку курдук икки биридимиэти дириҥэтэн үөрэтэри талаллара ирдэммэт буолуоҕа – билигин бары биридимиэттэри базовай таһымҥа туттарыахха сөп.
Математика, физика, химия уонна биология биридимиэттэрин бырагыраамалара быраактыка өттүгэр күүскэ туһаайыллыахтара, ону тэҥэ оҥоһуу өй технологияларыгар үлэлиир сатабылы метапредметнай түмүктэр ахсааннарыгар киллэрэр былааннаахтар. Бырайыагы от ыйыгар бигэргэтэр былааннаахтар.
