Андреева Анастасия Андреевна диэн 28 саастаах эдэр ийэ бу дьыл ыам ыйын 27 күнүгэр Дьокуускай куоракка сураҕа суох сүппүтэ.
Анастасия Петровскай уулуссатын 38 нүөмэригэр турар дьиэттэн түүн 03.30 мүн. тахсан, суолтан массыына тутан барбыт уонна ол кэнниттэн сибээскэ тахсыбатах. Ити иһитиннэриигэ олоҕуран, силиэстийэ уорганнара бастаан бэрэбиэркэ анаабыттара.
Онтон Анастасия ханна да ыраах айанныыр, олорор сирин уларытар былаана суоҕун быһааран, бэм ыйын 10 күнүгэр холуобунай дьыала тэриллибитэ. РФ Холуобунай кодексатын 105-с ыст. 1 чааһынан, ол эбэтэр, киһини соруйан өлөрүү бэлиэтэ баарынан.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, суһал-ирдиир тэрээһиннэр кэмнэригэр бэс ыйын 19 күнүгэр бу өлөрүүгэ уорбаланааччылар тутулуннулар.
Бу икки эдэр киһи олунньу ыйга хаайыыттан босхоломмут. Силиэстийэ сабаҕалыырынан, ол күн кинилэр олорсон испит массыыналара Лермонтов уулуссатыгар «куоластыы» турар Анастасияҕа тохтоон олордубут. Кирзавод оройуонугар кэлэн, айдаарсыы түмүгэр, кыыһы өлөрөн баран, оҥхой сиргэ кистээбиттэр уонна лабааларынан саппыттар.
Уорбаланааччылар ол сири силиэдэбэтэллэргэ ыйан биэрбиттэр.
Билигин кинилэри силиэстийэ кэмигэр хаайар туһунан боппуруос көрүллэр. Силиэстийэ салҕанар.
