Өрөспүүбүлүкэҕэ анал байыаннай дьайыы кыттыылаахтарын эбии тиэхиньикэнэн уонна гуманитарнай көмөнөн хааччыйар үлэ салҕанар. Аныгыс нэдиэлэҕэ АБДь зонатыгар 15 туонна гуманитарнай таһаҕас ыытыллара былааннанар. Бу туһунан брифиҥҥэ Хотугулуу-Илиҥҥи Донбасс өйөбүлүн уонна көмөтүн пуондатын, ону тэҥэ «Кыайыыга бииргэ!» өрөспүүбүлүкэтээҕи хамыыһыйа сүрүннүүр киинин салайааччыта Георгий Куркутов иһитиннэрдэ.
«Өлүөнэ эбэни туорааһын саҕаланна, аныгыс нэдиэлэҕэ 15 туонна гуманитарнай таһаҕаһы ыытыы былааннанар. Бу таһаҕас араас нэһилиэнньэлээх пууннартан, ол иһигэр өрүс уҥуоргу оройуоннартан, Дьокуускай куораттан, Алдан уонна Нерюнгри оройуоннарыттан хомуллан, салгыы тирэх пууннарыгар ыытыллыаҕа», – диэн кини эттэ.
Кини этэринэн, тирэх пууннар үлэһиттэрэ таһаҕаһы суһаллык тиэрдиини хааччыйар кыахтаахтар.
Сайыҥҥы кэмҥэ өрөспүүбүлүкэ быыһыыр сулууспатын кытта хардарыта бииргэ үлэлээһин чэрчитинэн тохтоло суох ыытыылары тэрийии былааннанар.
Кини бэлиэтээбитинэн, сыл саҕаланыаҕыттан фроҥҥа 150 туонна гуманитарнай таһаҕас уонна аадырыстаах баһыылкалар ыытыллыбыттар. Ону таһынан, Саха сирин байыастара сулууспалыыр араас подразделениеларыгар 80 тиэхиньикэ ыытыллыбыт.
Донбааһы өйүүр уонна көмөлөһөр пуонда кэлэктииптэри кытта көрсүһүүлэригэр анал байыаннай дьайыы кыттыылаахтарыгар анаммыт көмөнү түҥэтии туһунан иһитиннэрэр.
